財金冒險號 - 笑笑生 2016年12月15日
財金冒險號：
價值投資與辟邪劍
■劉央曾被傳媒封為「中國女股神」。 資料圖片
西京投資主席劉央，近期受訪時大言「畢菲特的價值投資論完結」。劉央大約十年前冒起，時勢造英雄，遇上2006年至2007年的中港牛市，周街股神，劉央被傳媒封為「中國女股神」、「女畢菲特」。潮退了，便知誰在裸泳。
2010年以來，中港股市載浮載沉，「牛央」管理之旗艦基金表現平平，例如近五個年度有四年跑輸MSCI中國指數。早有研究指逾半基金跑輸大市，本來好平常，但歸咎於價值投資過時，卻未免可笑。
小生鍾意睇金庸小說，又講嚇《笑傲江湖》：嵩山左冷襌與華山嶽不群決鬥，爭奪五嶽派掌門寶座，兩人同時使出辟邪劍法，結果左被嶽刺盲雙眼。原來左偷練嘅，係嶽不群刻意畀間諜勞德諾偷走嘅假《辟邪劍譜》，所以學藝未精，有形無神，慘敗於真正辟邪劍法。
劉央投資嘅一大特色，係熱衷買新股，但畢菲特幾乎從來唔買新股，因為最清楚公司價值嘅大股東或管理層決定上市時間及價格。
價值投資，用一句話概括，就係豆腐渣價錢買燒鵝髀。畢菲特師傅Benjamin Graham講過：「市場短期係投票機，長期係個磅」，比喻市場最終會反映真正價值。價值投資可能暫時無效，但係唔會死，死嘅只係學咗假辟邪劍法嘅人。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com
