智取大市：
港股睇唔到出路
■外資難有積極買港股嘅理由。 資料圖片
周三氣氛好番少少，成交大咗少少，開始有新錢入市，以為旺番啲，但周四主流股份幾乎全線回吐。如果奉行短線趨勢投資，一見有勢就追，唔好意思，大家周三有機會已經摸咗頂。
呢一刻唔肯定港股已見短期頂，話唔定仲有得衝破23000
點，然後再繼續向上爬格仔。不過，周三開閘、周四就落閘放狗，已足夠令人感覺非常不良好，預示2017年初賺錢難度比2016年同期更高，餘下時間唔易過。
最令人擔心嘅係連比較貼市嘅人，都一買即hi，返頭客只會越嚟越少，咁下次反彈浪邊個肯出嚟接貨？市場對港股需求肯肯定萎縮。供應方面，大戶一有機會就鬥快掟，潛台詞係揸重港股嘅人都幾心急將手上港股甩手。
鬼咩，望一望恒指，幾乎迷失咗十年。土生土長香港人諗住熟邊區買邊區，所以MPF先會買港股，股票又買港股。除此之外，好難諗到外資積極買港股嘅理由，試問投行要sell客去買一個10年冇乜賺蝕嘅港股容易，定係sell客去買年年升嘅美股容易，當然係後者。迷失開，只會繼續迷失落去，即使本欄已叫大家23000點前減持，但見到周四港股咁樣，當堂感到納悶非常。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
