異動空間：
超時空相反理論
■毒霾問題已到生死存亡之時，核電需求比例料將提高。 資料圖片
同一日睇到兩篇市評，先吹兩嘴。第一篇大意係話「家陣人人睇升，所以我睇跌」。又係相反理論，fine。再睇另一篇，作者話「目前市場睇淡者眾，所以我睇升」。Wow！真係平行時空，咁究竟邊面先啱？無科學
統計數字，真係口同鼻拗，何況目前唔係大牛，又唔係大熊，觀點好難一面倒，連牛熊證街貨分佈都係50/50，邊面人多擠逼真係有得睇？斷估確係無痛苦，因為最易打橫被抬出場。
講番股票，今年主題炒通脹，金銀銅鐵錫價格上漲不在話下，原來有種商品今年已累升18%，就係鈾。本周二（10日）全球最大產鈾國哈薩克宣佈減產10%，刺激現貨鈾價當日飆升一成，但睇番2016年鈾價累瀉41%，12月份更跌至每磅18美元的12年低位，反彈水位相當充裕。
世界核能協會數據指，目前全球興建中的核電機組逾60個，中國就佔其中20個，2020年將成為全球第二大核電國。再講，毒霾問題已到生死存亡之時，燒劣質煤發電必然逐步被取代，再生能源（包括核電）比例將不斷提高，對鈾需求將更為殷切。本港上市公司中，最受惠股份非中廣核礦業（1164）莫屬。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com
