中環在線：睿見上市
劉學斌一身藍招水
■劉學斌（右）明顯係花過心思打扮先去敲鑼。 謝榮耀攝
話咁快又過年，今日已經係農曆年最後一個交易日，猴年最後一隻新股噚日掛牌，呢隻喺內地辦學嘅睿見教育（6068），老闆劉學斌可能見雞年就快到，同班管理層著到拜年咁樣，而劉老闆本人應該好鍾意藍色，
如果唔係又點會由頭到腳都係藍色喎。
呢期真係好多人鍾意藍色，好似特首參選人葉劉淑儀，佢早兩日去電台做訪問，就表達咗對藍色嘅熱愛，由手袋藍到落腳，仲將對腳放埋上枱，大show藍色靚鞋。
與葉劉taste相近
財經界都唔弱，睿見教育老闆劉學斌竟然同葉劉一樣咁鍾意全身藍色，西裝、領帶、甚至一對鱷魚皮皮鞋都係藍色，佢搵到呢款藍色皮鞋都真係幾好嘢，搞到華華即刻想唱蘇永康嗰首《有人喜歡藍》。
風水師麥玲玲爆料話，好多上市公司老闆好信風水命理，個別老闆出席活動都會搵人算一算，講定著邊隻顏色嘅衫去，家陣講緊去上市儀式敲鑼咁大件事，佢睇劉學斌著到全身藍色，估計應該搵過高人指點。麥玲玲指，藍色屬水，劉老闆可能五行欠水，或者水比較旺佢，所以就咁藍囉。
而作為猴年最後一隻新股，劉學斌似乎亦想提早同大家拜個早年，一班董事、員工出席上市儀式時都戴上搶眼紅頸巾，好有新年氣氛呀！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
