財經評論：南港島綫真正挑戰
■隨著南港島綫通車，來往南區更方便。 資料圖片
隨著南港島綫通車，唔單止來往南區方便咗，仲可以帶動南區人流，到底是福是禍？南港島綫某程度上舒緩香港仔隧道塞車嘅狀況，無可否認通車之後，塞車嘅情況得到頗大嘅改善。之不過，港鐵（066）喺通車第二日就發生停電，令服務受阻。
啱啱通車就發生咁嘅事，港鐵果然堅持宗旨：「連連故障，年年加價」。
南港島綫通車後，亦都帶旺鴨脷洲嘅人流，就連離曬地嘅林鄭月娥都要嚟落區。無錯，南港島綫的確為鴨脷洲增加咗好多人流，就好以海怡半島，有唔少人搭去outlet，係正港鐵出口旁邊嘅Prada outlet仲出現排隊購物嘅人龍，確實令人意外；亦多咗好多行山客到利東站嘅玉桂山行山，增加咗遊客到鴨脷洲大街感受漁港風情。人就多咗，但唔代表收入多咗，不過業主唔會咁諗，所以有好多小店都開始擔心加租嘅問題。而事實上，某啲租戶已經商戶因為加租，而被迫遷。
慶幸嘅係，南區冇因為通車而大幅削減巴士路線，南區嘅居民仲有得揀搭咩交通工具，都算係不幸中之大幸。同樣係南港島沿綫嘅海洋公園，通車對佢哋黎講，一定係好事。事關人流多番啲，不過最令人驚訝嘅係佢哋長者人數多咗70%。點解？因為長者搭港鐵有兩蚊優惠兼免費入場。不過又咁佢哋40周年推出40蚊嘅門票，都吸引咗好多年輕人入園，海洋公園嘅CEO李繩宗話整體餐飲消費有雙位數增加。
當大家以為南港島綫運作得唔錯嘅時候，我提提大家，其實南港島綫嘅挑戰尚末來臨。十月海洋公園哈佬喂先係佢哋真正嘅挑戰，事關每年十月嘅晚上，港島一帶，來往南區嘅巴士站都會出現長長人潮，到時候港鐵能否同時間處理大量人流呢，我哋拭目以待。
記者：何紫恩
財經評論 舊文
來源 source: http://hk.apple.nextmedia.com
