【實力取勝】教你點揀強勢股（陳承龍）（第115期）
2017-3-12 13:00:29
話咁快又一個禮拜，剛過去呢個禮拜嘅市況其實係幾悶，大價股冇乜太大焦點，極其量炒嚇啲內房股，不過，我覺得個市底已經算係唔錯，有啲整固格局嘅感覺。更關鍵嘅係，市場開始多咗人睇淡，連早前睇今年恒
指40000點嘅青姐，都好似縮縮哋，喺佢日前在《AM730》嘅專欄度都入丁蟹數，喺咁嘅格局下，小弟反而幾放心個市仲有得升。
上周日，小弟去咗一個由另一間傳媒搞嘅投資講座，講真，平時啲投資講座我好怕去，因為幾悶嚇，不過今次呢個一定要去，因為係我師傅陸文第一次出嚟喺公開場合講嘢，事實上，陸文喺信報筆耕超過40年，但係從未出嚟見過人，難得師傅邀請小弟，梗係要畀面啦。
臨開場前，師傅話原來想拉埋我上台做小小分享，因為佢話，今次議題係想從人嘅性格開始講起對做投資決定嘅影響，當然，最後我冇上台，始終大家係不同媒體，可能有少少唔方便。事實上，每個人嘅性格係會影響佢唔同嘅投資決定，而呢方面，我以前都喺呢度略為提過，就係話，就算我畀同一隻冧把你哋，但可能因為唔同人嘅性格甚至乎運氣而有不同嘅結果，有人喜歡走短線，兩格就食，有啲人喜歡揸長食到盡，有啲硬係喜歡等佢升咗先嚟高追，所以性格係好重要。
點解陸文咁多年唔出嚟講嘢，點解今時今日先出嚟講嘢，一，我估係時代嘅變咗，媒體都要多搞呢類型嘅Marketing嘢，二，呢個係陸文自己講嘅，就係當年佢應承咗曹sir會一齊出嚟講嘢，曹sir講多啲中長線投資部署，而陸文就會多講一啲佢最強嘅中短線投資部署，可惜，最後曹sir走先，而今日陸文出嚟講嘢，某程度就係補返呢一個遺憾。
正如上述所言，陸文就係以中短線部署見稱，而當日佢就教咗大家點揀強勢股，就係睇相對強弱指數（RSI）同成交嘅配合嚟揀股，老實講，佢十幾年前已教過我呢招，不過我冇同大家講過，而其他招數如單日轉向博反彈，都其實係佢以前教我嘅。
嗱！始終呢招RSI配合成交嘅搵強勢股落鑊係陸文創嘅，所以我都係唔太方便再攞嚟講，總之，當一隻股嘅RSI可以維持一個高水平，而且又有成交支持嘅話，就係強勢股，未必如坊間所言嘅超買，而通常有成交支持嘅，即有醒目資金入咗場，點都有後著，不過，我都係講到呢度算啦！因陸文話太多人知呢招，就通常會失效，所以有睇我呢篇文嘅你，有福啦。如果想知多啲點用RSI揀強勢股，可以等嚇，因為我知陸文可能會遲啲開班授課，到時大家可以跟進嚇。
不如咁啦！陸文畀咗一隻近期符合曬佢呢招條件嘅強勢股過我，就係雅居樂（03383.HK）。嗱！你哋自己睇嚇幅圖，睇嚇個RSI同成交嚟參透嚇啦！講完。
實力取勝 - 陳承龍 舊文
來源 source: http://www.winmoney.hk
