【不問價追】要識睇人眉頭眼額（小炒王梁心欣）（第115期）
2017-3-12 15:00:44
「成也北水、敗也北水」老土啲講，二月尾至三月初，個喉嚨日日好似被人掐住掐住咁，唔上唔落，一日話有錢到、一日又話流走，搞到自己好無性格，日日睇人面色。無計啦，內地資金話事、佢落
嚟炒都仲有得去，一停手，連粥水都無得你食。
咁要衝破障礙，都要識跟住個勢。以前6999、6998牌子代表北方（現為滬港通牌子）現在5999、5998方為強者（代表深圳水源），一隻股有冇錢到記得認牌，希望港交所千祈唔好行「遮牌仔」制度，到時想望都無。
認清牌子之後，就要認清股份。有啲離奇地強嘅股份一定係北水愛戴。舉個實例：舜宇光學（02382.HK）以及海信科龍（00921.HK）肯肯定係北水至愛，強橫程度簡直係打橫行都睇唔到。
海信科龍，小炒王在$6.X推介過，業績轉好，白家電銷售改善，但勢估唔到現在飆上$9.X水平，在家電股之中已經稱霸。什麼創維數碼（00751.HK）、TCL多媒體（01070.HK）、海爾電器（01169.HK）半途梗有一半做咗物流，都追唔到海信科龍半個馬鼻，所以921一回吐就係上車之時。
由幾蚊開始買舜宇光學，賺一倍到十幾蚊走人，我已經以為自己執到，好可惜，再望望佢已成為$5X之流，心痛也無用，出面大熱講緊舜宇會做指數股，萬一要炒到瑞聲科技（02018.HK）差唔多質地，恐怕我都會暈低。又係嗰句，趁回軟就執返2382落袋，萬一各大投資銀行唱好，又係一去無回頭。你見到北水一直對舜宇念念不忘，咁千祈唔好輕易放棄，否則好易走寶。
我都明大家非常「畏高」，驚高追或者摸頂，如果真係唔想同北水癲，你可以留意中船防務（00317.HK），靚股在手世界通行。軍工股老老實實最正宗得佢一隻，加上走勢靚絕，回調吸納之選點少得佢，講真，好多股值得研究，咪一味話悶，只係你唔知market走向，跟錯邊而已。
不問價追 - 小炒王梁心欣 舊文
來源 source: http://www.winmoney.hk
