博紅股 恒基勝煤氣
2017年03月23日
美股高位回吐，杜指上日插左237點，港股跟住都要跌吓，恒指上到兩萬四千六，開始有啲阻力，昨日跌番272點，所以叫股民戒急用忍，點都無錯。
美股係金融股帶動下回吐，沽家解釋係美元回軟同債息跌番，擔心息差收窄影響銀行邊際利潤。表面上，華爾
街呢個反應係聯儲局宣佈完加息後放鴿嘅反應，認為鴿派政策不利銀行嘅回報。陸羽仁嘅解讀，首先係大家唔好太過當聯儲局嘅鴿派言論當真，佢係聲明中對未來加息步伐唔係咁來勢洶洶，主要係會前班理事已經放左一輪鷹。到加息落實，為免過份驚嚇，咪唔講得咁得人驚囉，畢竟美國三月份加息就係早過年頭時的預期，呢個行動比言論重要，所以聲明唔係咁鷹，只係無咁驚嚇，但市場睇長少少，就不能過份當作好消息了。
金股趁勢彈一彈
美資大行都有啲類似睇法，好似高盛就話如果美股因為聯儲局嘅言論大升，咁就有違局方想控制通脹同資產膨脹嘅原意，咁即係話如果美股太過亢奮，就可能令銀根加快收緊，呢個亦係美股係飆升一輪後，出現回調，先前升得太多嘅亢奮後遺症，都係好重要因由。
周二美股受壓，恒指周三隨外圍向下，低開256點，報24336，開市後大市反覆向下，一度失守24300，午後跌幅一度擴大至386點，其後跌幅收窄，尾市重上24300，恒指收報24320，下挫272點，跌1.1%；國企指數收報10456，下滑187點，跌1.8%，升得多的國企亦跌得多，大市成交金額1035億元。
大市跌1.1%唔算多，主要因為美元弱有利人仔對港股有支持。避險資金流入金市，部份貴金屬股逆市造好，中國黃金國際(2099) 升3.2%，報16.84元；招金(1818) 升2.3%，報7.56元。
長實遲賣樓收入仲多
呢排藍籌陸續宣佈業績，長和 (001) 公佈2016年全年業績，盈利330億元，按年上升5.9%；每股盈利8.55元；末期股息每股派1.945元，連同中期股息0.735元，全年派息2.68元，增5.1%。長實地產 (1113) 公佈2016年全年業績，純利按年升13.5%，至194.15億元；每股盈利5.05元；末期息每股派1.15元，全年共派息1.53元，升9.3%。撇除投資物業重估，去年核心盈利180.32億元，按年升16%。長實去年賣樓唔多，好多盤都係今年推，點知遲推個價仲好，如果樓市維持到，咁長地今年賣樓收入應該幾和味。
早長和一日公佈嘅恒基地產(112) 都OK。呢系公司鍾意送紅股，今年煤氣增長好少，都有10送1紅股，母公司恒基盈利增長多啲，同樣有紅股送，股價逆市上升，最高去過49.3元，收市報48.05元，升左0.55元。有地產代理同陸羽仁講，恒基去年其實賣樓唔算多，但佢地價平，所以都頂到利潤，今明兩年佢在建項目多左，未來應該賣樓收入先係收成期。如果鍾意收紅股嘅話，咁買阿媽恒基可能好過囝囝煤氣喎。
陸羽仁
金融High Tea 舊文
來源 source: http://hdfin.stheadline.com
