財經評論：
大件唔一定夾抵食
■星漣海部分四房單位，客飯廳與廚房之間有幅逾10呎間隔牆。 資料圖片
海景大宅作為換樓升級是理所當然，近期馬鞍山有個臨海項目星漣海，全數提供三至四房單位，面積大銀碼大，樓價動輒千萬元，但大大間不代表好用，部份客飯廳與廚房之間有幅逾10呎長間隔牆，感覺窄長又奇怪，阻
礙出入，擺明嘥位又如何？現時樓市狂熱，你唔買有人買，依然去到貨。
無無謂謂的間隔牆，形成逾5呎闊通道，面積逾50方呎，以每呎約1.4萬元計，價值約70萬元，買家要真金白銀畀錢購入，發展商開心賺到笑，長實（1113）解釋，根據屋宇署條例，樓書標示此處為Corridor走廊，輕描淡寫真簡單，但細心諗諗，若買家自行拆牆，後果自負。
星漣海首日推188夥，賣出約七成，繼而加推加價2%，至於貴價接貨後，將來淪為二手，能否容易轉售，又或跟得上市況升幅，唯有自求多福。睇番區內同系半新樓天宇海及嵐岸，與星漣海共通點，同樣建於海邊及有大單位，弊在面積越大，樓價升幅越少。最近天宇海1個四房戶以1,100萬元賣出，業主持貨七年，升幅不足12%。
嵐岸的相連大宅放盤一年多，最終以1,368萬元賣出，揸足十年，只升9%。如此成交價不理想，是否意味當年一手價已透支多年來的升幅，讀者自行判斷，但或多或少，對星漣海有啟示作用。星漣海折實呎價逾1.2萬至1.6萬元，貴過同區二手單位。買樓自己揀冇得怨，同區銀湖．天峰1個實用面積980方呎單位，以1,420萬元易手，業主持貨六年半，升67%，的確同人唔同命，同傘唔同抦！
記者：溫潤潔
財經評論 舊文
來源 source: http://hk.apple.nextmedia.com
