中環在線：梁錦松話入政府「要睇上帝」
■梁錦松（中）噚日現身南豐集團活動，感謝上帝畀好多機會自己。 方楚茵攝
前財爺、現任南豐集團行政總裁梁錦松又有上帝論！舊年被人問到會否參選特首選舉，佢話要睇上帝安排，結果佢冇落場，咁家陣林鄭當選，有冇邀請佢再加入政府呢？佢一邊話冇，一邊又話「好
多嘢要睇上帝安排」。
梁錦松噚日出席集團活動時提到，感謝上帝一直畀好多機會香港同自己，亦畀咗好多平台佢做貢獻；加唔加入政府唔重要，最緊要做到嘢，𠵱家喺私營機構一樣開心。
不過轉過頭，佢補充話，好多嘢講唔定，「當上帝唔要你做嘢時，你點追求都做唔到，但上帝要你做時，你點推都推唔到！」真係玄之又玄。
記錯薯片房策讚林鄭
講到有冇私下畀建議林鄭，梁錦松就話，一直有同林鄭傾，之前同另外16位有心人成立「教育2.1」，曾向特首梁振英提出名為「不一樣的教育」報告。
教育之外，佢認為，政府需要重視房屋政策，仲話支持畀六成人住公屋，當被提醒，此乃林鄭選特首時，對手曾俊華提出嘅建議，梁錦松就話一樣得，公屋由租變賣係好事；而且，房屋並非小眾嘅事，政府應該花一兩年時間公開諮詢。
但林鄭民望低迷，點樣可以有效做到公眾討論？梁錦松就撐對方其實好識溝通，唔只同發展商，仲可以同公眾溝通，搞公眾論壇都得呀。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
