Money Walker - El. 2017年4月19日
Money Walker：避險指標亮起黃燈
■金價向1,300美元邁進，加上圓匯轉強等，避險指標亮起黃燈。 資料圖片
今時今日要預測港股後市越來越難，除因為北水流向近乎無路可捉，亦由於地緣政局、國際關係、軍事角力呢啲範疇，往往左右到環球氣氛，但一般散戶又欠缺能力睇通。
北水尚有數據可查，但要了解政治事件如何影響外圍氣氛，就要費時飽覽有關新聞。民調結果雖能簡單快捷理解，但因可被操控而不宜盡信，博彩公司賭盤賠率喺預測去年英國脫歐同美國大選結果上又失準，世上似乎再冇分析外圍政治情況嘅簡單可靠指標。
不過即使無力讀懂國際形勢，散戶mon住避險資產每日升跌，觀察市場對國際局勢反應，仍係重要而簡易嘅功課。市場樂觀情緒近期明顯大為降溫，十年期美債息日前終於以雙頂型態跌穿約2.3厘嘅支持位、美元兌yen喺圓匯轉強下破咗110，連同金價向1300美元邁進，上述避險指標亮起黃燈，環球risk off味濃。未來要留意yen會否進一步突破100關，以及金價能否企穩1300美元之上，以確認避險黃燈轉成紅燈。
市場氣氛惡化，法國大選同北韓局勢固然關事，而隨住侵侵上任近百日，講就兇狠、做就冇計，令人失望。筆者認為，去年11月美國大選後炒起嘅環球復甦同通脹主題，怕且要暫告一段落，資源股同金融股應該要唞返一排。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
