智取大市：第二季悶住咁贏
■大新銀行星期一升2%。 資料圖片
3月下旬開始，港股由高潮變膠著，整固期間科網股輪流強勢，濠賭股喺4月初博彩數據出爐前炒上，除此之外，其他板塊得個chok字。星期一有雄安新區「千年大計」測試下大市，港股當日升149點，建材、商品股小高潮，但主流商品股似反彈多
過轉強，皆因成交唔夠多，向上動力有限，亦反映資金取態審慎。好消息都炒唔起，等於話畀大家聽，短線整體大市有反覆冇高潮。
舊年第四季至今年第一季，由低殘高槓桿周期性股份撐起港股，但主流周期性股份股目前已經唔平，第二季退而求其次，基金要吼次線周期性股份去追落後，3隻中小銀行股大新銀行（2356）、大新金融（440）同創興銀行（1111）市賬率喺1倍或以下，業務穩健冇蝕錢風險，舊年相比高槓桿股份冇肉食，但高槓桿股份升得七七八八，貨比貨之下，中小銀行股望落又幾吸引。呢類股波幅唔大，但於股市淡季嘅第二季，適逢升市終結進入唞氣階段，買入持有兩三個月，上望一成以上升幅似乎冇乜難度。
大新銀行星期一升2%，睇圖已經係大陽燭，但第二季要悶悶哋咁贏，自己先要調整心態，買入後一日望報價一兩次就OK，切忌望得太多悶死自己。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
