中環在線：
鄭家純孖太太外出現疲態
新世界發展（017）主席鄭家純自從年初突傳中風，需入院休養後，就久久未有現身。純官不但未有出席新世界業績會，以及全國政協大會，就連上月嘅特首
選舉投票日，亦因「避免操勞和舟車勞頓」缺席。不過，日前有傳媒影到純官健步如飛，到底係咪已好番曬，唔露面只係唔想見人？
記者送花 保安拒代收
華華噚日朝早就去到鄭氏位於淺水灣道嘅大宅，打算向純官送上慰問，仲帶埋紮靚花㖭。大約11點左右，就見到純官座駕駛回大宅，佢太太葉美卿就坐喺身旁，純官似乎略顯疲態，微微合上眼休息，見到記者先至即舉手示意，不過就未有回應記者。
事實上，日前拍賣行蘇富比已公佈，純官親自打電話競投粉紅巨鑽，紀念父親鄭裕彤；亦有傳媒拍到純官已出院，仲已經可以跑步㖭，照咁睇，佢身體應該慢慢康復緊喇！
記者噚日原本打算送上鮮花，可惜大宅嘅保安話，「我打工㗎咋，平時都冇見過佢（純官），佢阿爸（鄭裕彤）之前住咋嘛，我唔收得紮花㗎！」結果就剛好遇上歸家嘅純官。之前純官朋友知悉佢身體抱恙，久久未有出席公開場合，都紛紛祝福佢早日康復，華華喺度亦祝佢身體健康，大家都好掛住你呀！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
