經濟客艙：我無法一炮過買樓
■樓價升到離曬地，而家追入怕坐艇，唔追又怕後悔。 資料圖片
「我唔係貪錢嘅女人……點解要講到我係一個貪錢嘅女人，以前唔係，依家唔係，將來都唔係。」
呢句就係Natalie同Tony仔最後嘅說話，Tony仔亦冇刻意挽留，由得Natalie
轉身走。今日坐低同Tony仔飲杯嘢，飲乜落肚唔重要，重點嘅係有個地方，畀佢釋放內心嘅不快。
「Natalie話我畀唔到佢要嘅安全感，又話我人生冇目標，連畀佢一個家嘅感覺都冇。」
講真做Freelance設計師嘅Tony仔，每個月收入時高時低，多好時候更係餐搵餐食餐餐清。「我好驚，Natalie時不時Whatsapp我新盤嘅新聞，佢果種強烈嘅買樓慾望，已經撲熄曬對佢嘅幻想。依家樓價升到離曬地，唔敢去，又怕將來後悔；心口掛個勇字去入市，又怕坐艇；你估個個屋企，都好似前日海之戀果位睇樓客咁，隨時拎七位數出嚟、一炮過買樓咩？食、住、行係人生嘅基本需求，我好驚Natalie有一日會問我，食飯，係唔係人生追求嘅目標。」
不過，Tony仔被飛嘅係另有因由。
話說Tony仔今年應承畀Natalie生日驚喜。生日當晚，Tony仔喺事先冇預演下，喺11點58分連同一個磅半嘅雜果忌廉蛋糕，去搵前女友Natalie，踏正淩晨12點按門鐘，畀前女友驚喜。金牛座嘅Natalie，最鐘意食甜品，見到Tony仔送上嘅驚喜，初時開心，後來傷心。「都跟咗你兩年，原來喺你心目中，只值一個百五蚊、茶餐廳嘅雜果忌廉蛋糕。」男人日日都可以懶，但女友生日點都唔可以hea過就算。懶極都可以落超級市場買盒料，焗個餅出嚟，誠意搭夠。
如今Tony仔，女又冇，樓又買唔到。幾時都話，男仔唔夠世故係一種罪。
Captain Cool
https://www.facebook.com/seeforcaptain/
本欄逢周一刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
Captain Cool
經濟客艙 - Captain Cool 舊文
來源 source: http://hk.apple.nextmedia.com
