羅三公子交到貨
2017年05月10日
法國大選落幕，市場無乜消息，咁啱有周刊就爆料，話鷹君羅老太早前出招，想換創辦人羅鷹石嘅遺產執行人，仲聞到一陣爭產味。鷹君羅氏家族係香港名門，最為人熟悉係上海姑爺羅康瑞，富豪系嘅羅旭瑞都做過旅發局主席，至於現時執掌公司主席嘅係三公子羅嘉瑞做過創業
板主席，係商界係猛人。
冠君見一年高位
近年好多富豪家族都爆吓爭產案，財多自然意見多，好多時公說公有理，婆說婆有理。家事小股東唔理得咁多，從佢哋角度，最緊要公司做得好，對股東有義氣，從呢個角度，佢哋就覺得鷹君呢幾年做得唔錯。地產好做，但點賺錢同賺到錢點對股東人人唔同，最近呢10年羅嘉瑞基本上已經係話事人，佢安排咗公司分拆好多資產成立信託基金，套現之後就大舉派息，咁做一方面可以體現公司價值，又能夠回饋股東。分拆可以吸納市場游資，然後再派俾股東，係充份利用市場創造價值，早兩手公司又係地價低潮，係科學園旁邊執咗塊平地，所以鷹君(040) 近年表現相當唔錯。由於羅家成員好多都係鷹君股東，照計佢哋都係受惠者，所以一時都唔明點解有人要爭產。
象以齒而焚身，有人估計點解羅家會爆出爭產暗湧，皆因公司手下有唔少靚資產，旗艦鷹君外，持有中環物業嘅房託託冠君(2778) 都炒上咗一年高位。冠君多年前分拆，等鷹君可以取回資金收購同派息，冠君係2016年可分派收入創出新高，預期來年租金收益的增長動力將較溫和，物業組合整體租金收益預計會保持穩定。佢嘅短期有利因素係而家寫字樓市道升溫，特別係港島區物業受美利道停車場招標效應，價錢呢排飊升。
中港其他消息唔多，港股本來無乜方向，但午後科技股抖咗幾日氣再度發力，股王騰訊再度爆上，大市午後升幅擴大，一度逼近24900，恒指收報24889，升311點；國企指數重上10000關，收報10128，漲146點，成交710億元。呢排個市交投唔多，比較容易波動，個市有可能都係升兩步、退一步。
電力內航受惠能源價跌
藍籌股中騰訊(700) 再創新高，以全日高位收市，收升2.45%報250.8元；將於周三公佈業績的港交所(388) 升2.53%報194.4元；滙控(005) 連升5個交易日，升0.52%報67.15元；兩大強勢股友邦(1299) 同港鐵(0066) 繼續造好。比較特別嘅板塊係電力股，市傳中國政府考慮將火電及核電企業重組合並，刺激電力股上升，華潤電力(836) 升5.5%報14.3元，為表現最佳藍籌股；大唐發電(991) 大漲16%報2.59元；華電國際(1071) 收升7%報3.37元；華能國電(902) 升6.7%報5.6元。油價上個星期急跌，推低埋煤炭商品嘅價格，美息向上加上央行縮表令游資減少，對能源價格有壓抑作用，所以有資金流入會受惠嘅電力股，估計內航股都有機會得益。
陸羽仁
金融High Tea 舊文
來源 source: http://hdfin.stheadline.com
