恒大大夾倉
2017年05月31日
港股端午放假，美股就繼續牛皮。係5月份最後一個交易日大市夾高，個別仲爆發驚人升幅，最搶眼係呢個星期大力chok上嘅恒大(3333) 。
恒大爆升力度咁強勁，相信唔會係本地散戶甚至外資基金嘅傑作。由於佢準備返回內地A股步聲漸近，唔排除吸引左北水
落疊，同一時間，同佢係賣樓榜叮噹碼頭嘅碧桂園(2007) 表現同時強勁。有熟悉公司嘅人講，恒大去年賣樓超過3000億元人仔，今年目標仲高，但老闆許家印落左命令，除左要量之外，今年公司仲有兩樣嘢要做，一係要提高利潤；另一樣係減低負債。公司動作同消息多多，股價就同場上映一場「大夾倉」。
削永續債兼回購釀「空難」
恒大過去生意額高速增長，實行薄利多銷，最後成功搶佔市場份額，成為賣樓一哥。呢個戰略目標要付嘅代價，係利潤率偏低同埋負債高。恒大分拆地產係A股集資，公司承諾要提高利潤率，要做到呢個要求，管理層訂左幾個方法，包括係贖回公司早前為了吸水發行嘅永續債，永續債雖然可以長期融資，但利息高，蠶食左公司嘅利潤，許家印就講過話永續債對債權人好，但有啲對不起小股東，所以決定逐步買回呢啲高息嘅工具。為了要籌集資金，公司改為同基金係項目上進行股權合作，透過呢啲方法，管理層聲言有信心可以提高利潤率。
恒大一貫係以超進取策略搶佔市場，令負債率偏高，影響左基金對佢嘅評級，特別係外資對大陸房地產市場唔係咁熟，取態額外審慎，一度令到每年賣樓幾千億元的恒大，市值只有幾百億元，但隨著對佢熟悉嘅大陸資金增多，加埋佢之前回購減少左貨源，令佢呢排市值急速膨脹，單係上個交易日股價單日差不多上漲左400億元，幾乎係佢一年前市值嘅50%。
恒大暴漲，市場就傳來空軍損手重創嘅消息。呢排沽空機構狙擊科網股頻頻得手，但外電就引述以倫敦為基地嘅調研公司IHS嘅分析員話，恒大借貨沽空嘅成本由今年1月以嚟差不多急升左五倍，去到近10%水平。
恒大一年間翻兩番，令空軍大出意料，該公司估計沽空股份數量佔恒大流通量近20%，而家佢嘅股價比大行預測嘅平均數高左一倍以上，但個別大行好似摩根士丹利仲繼續唱好，令淡友處境惡化。睇番恒大係A股上市、減債、回購、加埋大行唱好，連串步驟有啲反狙擊空軍嘅味道，仲釀成可能係今年最慘痛嘅「空難」。由於而家係財技大撼大，未來股價變動可以好戲劇性，散戶跟炒一定要緊貼市況，如果唔係就索性剝花生睇戲好過。
聯華醜股炒翻身
恒大連升九日，仲一口氣大漲23%，收報15.2元，帶動成個內房股板塊超搶眼。升幅接近10%嘅內房股比比皆是，招商局置地(978) 升左11%，報1.66元；融創中國(1918) 升10%，報12.9元；碧桂園(2007) 。
內房勁升，加埋中資電力股普遍造好，係兩大板塊推動下，假前恒指一度高見25744點，最多升105點，於此水平遇阻力，尾市升勢稍收窄，收市仍穩站25700以上，恒指收報25701，升62點。
聯華超市(980) 係假前公佈，公司主要股東上海易果電子商務，同意向阿里巴巴(中國)網絡技術出讓其所持的2.02億股聯華超市內資股股份。做開超市嘅聯繫2016年全年虧損 4.50億元人民幣，股價插低後反覆徘徊。呢次主要股東賣盤俾電商，顯示左傳統實體零售商仲有一定價值，股價低位急彈，收市報3.92元，升左24%，正宗係醜股大翻身。
陸羽仁
金融High Tea 舊文
來源 source: http://hdfin.stheadline.com
