中環在線：
恒生換CEO 水哥變六朝元老
■在事業與馬拉松賽道，水哥都繼續跑。 資料圖片
恒生（011）「一姐」李慧敏與執行董事馮孝忠，上星期齊齊宣佈下月初退休，逍遙嘆世界，都係今年「登六」嘅恒生公關阿頭兼「長跑達人」張樹槐（水哥），就未打算退下火線。據聞，佢已獲延長合約，換言之，
喺佢嘅恒生職業生涯，將會同第6位行政總裁（CEO）合作。
水哥話當年喺1994年透過獵頭公司獲聘加入恒生，兼幫手成立企業傳訊部。佢指，第一位合作嘅CEO係歐肇基，當時恒生董事長係「利Sir」利國偉，而「恒生三老」之一嘅何添仍然擔任非執行董事。
之後，水哥分別同鄭海泉、柯清輝、梁高美懿、現任李慧敏合作，計埋即將接任做「一姐」嘅鄭慧敏，水哥呢23年共事嘅恒生舵手共有6位，3男3女，喺金融界都算一項紀錄。
11月戰紐約馬拉松
多年來水哥有好多難忘經歷，佢經常提到嘅深刻回憶，其中之一係1997年9月世銀年會在港舉行，時為國務院副總理朱鎔基來港參加會議，其間親臨中環恒生總行博愛堂，為「何梁何利基金第4屆頒獎禮」擔任主禮嘉賓。
水哥除咗繼續服務恒生，亦會喺佢熱愛嘅馬拉松賽道繼續奔跑，今年11月會去美國，參加世界六大馬拉松之一嘅紐約賽事。
李華華
mailto:LiWaWa@AppleDaily.com
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
