智取大市：鋁股之後輪到……
■兗煤股價一浪高過一浪，等睇佢上返大時代高位10蚊水平。 互聯網圖片
自從7月初騰訊（700）《王者榮耀》經歷一輪小狙擊過後，恒指由25500點起步，升一個月升超過2,000點，每次調整只限於小時圖兩連陰下跌，然後即市就會止跌回升。恒指噚日上晝正正跌超過200
點、小時圖兩連陰之後隨即回穩。呢個訊號咁明確，以後就識做了，只要有一次小時圖出現三連陰，或者小時圖跌勢異常急勁，就會觸發較大型調整市，到時先再減持港股。而噚日下晝市場氣氛仍然理想，跌嗰半日睇嚟大家驚都未驚過，咁就繼續趁住熱鬧先。
繼洛鉬（3993）後，中鋁（2600）、俄鋁（486）竟然升得仲癲，煤炭股兗煤（1171）高位成交顯著增加，股價剛剛破頂，嚟料啦啩。
兗煤之前發過盈喜，預計淨利潤按年勁升440%，上年同期每股盈利12.05分人仔，即係每股盈利0.76港幣，粗略年度化市盈率5.4倍。當大行搵績優股唱好、逐隻踢高之後，兗煤係仲未被選中嘅細路，增長咁多，PE咁低，煤炭停產減產亦正進行中，連神華（1088）有項目停產，股價都能夠即日先跌後拗腰回升，證明買需夠。兗煤要成為大行唱好對象，其實唔難。
兗煤股價升浪亦一浪高過一浪，7月下旬喺8蚊有阻力，保歷加通道中軸有支持，成交大增而股價破頂，升勢有望加快，等睇佢上返大時代高位10蚊水平。
晉佳
晉佳
智取大市 - 晉佳 舊文
來源 source: http://hk.apple.nextmedia.com
