A股向好炒中金
2017年08月29日
呢個星期期指就結算，喺結算前恒指挑戰兩萬八千點關口，大市噚日早上喺內資股帶動下破關，但去到呢啲位沽貨壓力唔少，收市升幅大為收窄，最後仍然要喺兩萬八樓下低收。
兩萬八阻力唔細
今年港股已經升左七個月，會唔會繼續第八個月上升，成為市場話題。
過往股市逢七之年都係大波動，當中又以十月份較敏感，如果股市連升八個月，咁未來兩個月嘅累積升幅可能仲大，所以有啲講法覺得個市今個月調整吓仲好。
不過，大市唔係好似電梯咁扌禁上扌禁落，想升就升，想跌就跌，大市乘住呢排市場仍然有氣氛，好快升破左兩萬八，進而向大時代嘅28133點高位進發。不過，大時代高位呢個陰影唔細，個市上到去破位就開始腳軟，高位出現回吐。大市雖然係一步之遙，但阻力相當唔細。
2015年嘅港股大時代，主要由A股牛市帶動，當時氣氛熱鬧過依家好多，投資者相信喺中央鼓勵下，「政策牛」會有心有力，港股雖然只係跟內地炒，但過完一關又一關，大家當時目標係以2007年嘅三萬二千點為目標，認為好快可以衝頂。
相比之下，依家嘅市場氣氛同2015年比仲相差好遠，如果睇大市成交同股民參與幅度，點都唔似指數上番去大時代嘅水平。從呢個角度講，市況依家唔算低，但公眾投入程度唔算高，唔可以話過熱。
港股今年升勢一大不同，係香港跑贏內地好多，滬深股市近日先至好番啲，上證指數呢排先重上3300點阻力位，同15年嘅5500點相差好遠，噚日A股早段造好，成交量顯著上升，帶動埋港股向好，午後內地上漲乏力，港股就掉頭回落。上證指數昨日收報3362點，升0.9%，成交額3053億元人民幣，深證成指報10809點，升1.4%，成交額3355億元。港股就衝28000關無功而回，收報27863，升15點；國企指數收報11342，上漲53點，成交1174億元，係連續第三日成交過千億元。
瑞聲(2018) 績後獲多間大行唱好，瑞銀、野村及花旗齊予瑞聲145元目標價，股價急升11.11%，報137元，係表現最佳藍籌股，為恒指貢獻32點升幅，可惜騰訊(700) 跌番1.6%，報323元，拖低恒指52點。呢排追落後嘅內銀股個別發展，建行(939) 升0.4%，報7元；中行(3988) 升0.7%，報4.11元，但最大隻嘅工行(1398) 就跌左0.7%。
受惠A股造好炒上新高
呢排國企指數轉強，令到港股跟A股表現跟得緊左，相關股票都開始多左炒味。做唔少A股IPO生意嘅中金公司(3908) 呢排就飆升唔少。中金公司(3908) 啱啱公佈半年業績，錄得純利11.11億元人民幣，按年升93.2%，每股盈利34分，股價收報14.86元，升左7%，創左掛牌後新高。
中金喺大時代後掛牌，當時市場對佢前景相當唔睇好，股價曾經插穿10元，跌近8.93元淨值嘅水平。中金係內地先進嘅投資銀行，業務範圍覆蓋相當寬闊，可以話係中港股市活躍程度嘅晴雨表，佢剛剛公佈嘅業績反映左大時代後投資市場最差情況過去後開始回穩。以2016年嘅盈利計，佢市盈率17倍，息率只有1.2厘，計及佢半年業績升左九成，現價都可以話好平，資金大力炒佢上去，反映左市場有熱錢覺得兩地股市仲有得炒落去。
陸羽仁
金融High Tea 舊文
來源 source: http://hdfin.stheadline.com
