急升內房無謂高追
2017年08月31日
港股再度挑戰28000關口，成功高收喺心理關口上，至於係咪企得穩，仲要睇埋期指結算，但無論係咪破關收市，呢個月都好大機會八連升。
周二港股回調，低位已經見到有承接，到噚日大股好似騰訊(700) 造好，帶動大市向上。慢牛爬升，再創兩年新高
，但大市氛氛都唔算熱烈，入市資金冇明顯增加，上升股都係比較選擇性，所以唔係太多股民因為升市賺到錢。從淡嘅角度講，可以話入市資金唔多，升市能量唔多夠。但從好嘅角度講，就係個市未出現雞犬齊升，市況仲係比較理性。
許家印身家過左馬化騰
入市資金唔係咁多，相信一大理由係美國準備喺九月縮表，市場觀望緊縮表效應。正常嚟講，縮表係循序漸進，慢慢減少市場資金供應，本來資金供應極度寬鬆，縮表初期應該無乜感覺，到縮表縮到咁上下，市場資金供應有啲緊，效果先會浮現。
換言之，縮表初期實際效果唔會顯著，有嘅都係心理反應。心理反應係點最難估，最正路就係有預期、有準備，就唔會有過激反應，所以如果美國股市興烚烚，咁就要小心啲，相反如果佢都係上上落落，咁縮表啟動就應該會軟著陸。
恒指破頂，但市場話題係華置買恒大帳面賺左近百億元。中國恒大(3333) 噚日創26.55元新高，之後股價回調，收報24.35元，跌左4.5%，成交逾26億元。隨住近日恒大爆升，許家印身家激增90億美元，達367億美元，超越馬化騰嘅366億美元，略少於阿里巴巴集團主席馬雲嘅374億美元。資料仲顯示，受惠中國地產升值，內地地產富豪財富總計438億美元，升幅達85%。
陸羽仁同中環茶友早前研究恒大走勢，留意到沽空大戶且戰且走，一路未退，沽空者造淡唔係賭單邊，係會靈活咁轉倉，即係淡倉底，但有時會做短線好倉食吓快餐。喺咁嘅狀況下，牛熊角力唔會咁快完，最大機會係升吓跌吓鬥夾，散戶如果想抽水，最好喺低位入啲，高位沽啲，食吓波幅，呢個玩法最緊要係守紀律，走短線，定下死硬止蝕位，然後嚴守紀律一唔得就打靶。呢個方法過去都可以賺兩、三轉快錢。由於淡友唔似走清，呢個短線搵食方法可能仲有機會得，但記住食得鹹魚抵得渴，鱷口偷金要預左畀大鱷咬一啖先好行埋去。
恒大係咁升，帶動內房股輪流炒，噚日輪到隻世貿房地產(813) 單日爆升16%，報收16.62元，仲有融創中國(1918) 都急升10%，收報22.9元。世貿同恒大有啲唔同，早前茶友都分析過，世貿手頭有唔少靚項目，包括低價喺香港買嘅地皮，加上有4、5厘派息，數字上吸引，但佢升得咁勁，依家梗係唔會高追啦。
嘉域賣盤未落實先爆升
大市另一隻勁升股係股仔嘉域(186) ，單日急升96%，收0.49元，嘉域過去五年蝕左四年，去年大賺好多係會計帳目，生意額由11億元按年遞減至2.9億元，核數師對盤數表明有保留。公司股價急升只有一個理由，就係大股東簽左份不具法律約束力嘅意向書，可能出售公司65.85%股權。若果落實就會導致全面收購，咁公司嘅市值就由原本13.7億元暴漲至26.9億元。
個股異動，藍籌都一樣幾個別發展吓，恒指全日升329點，創左27個月收市新高，報28094；國企指數收報11374，漲78點，成交金額1059億元。大股騰訊(700) 升2.1%，收報326.6元，但前日熱炒嘅丘鈦科技(1478) 就逆市急挫12%，收報19.24元。
陸羽仁
金融High Tea 舊文
來源 source: http://hdfin.stheadline.com
