中環在線 - 李華華 2017年9月1日
中環在線：任總話當年
憶與陳元巡迴路演
特首林鄭月娥嘅金融智囊兼行會成員任志剛，同現任人行行長兼全國政協副主席周小川老友鬼鬼，就係人都知，不過年輕一代讀者或許未必清楚，協助呢位金融沙皇打開與內地金融監管高層溝通合作嘅開路先鋒，其實係現任政協副主席兼國開行原董事長陳元（圖），亦即係中共元老陳雲長子。
回歸前，陳元擔任人行副行長，與時任金管局總裁任志剛，常聯袂到倫敦、紐約、東京等巡迴路演，就「香港跨越1997的金融安排」，闡釋一國兩制下兩個金融中心運作概念。
噚日任志剛喺網誌《觀點》撰文，適逢本港慶祝回歸廿周年，特別勾起中港金融嘅合作，於一國兩制下又能保存兩種貨幣、兩個貨幣體制、兩個金融當局模式，一路走來殊不容易嘅回憶。
預告陳元將訪港
陳雲當年闡述「處理兩地金融關係的7項原則」，在本港回歸路上嘅金融發展史，可說扮演咗關鍵角色！任志剛亦喺網誌預告，陳元即將訪港，出席一帶一路與香港機遇活動。
前特首董建華早前自爆，亞洲金融風暴期間，曾透過時任國務院副總理錢其琛，問中央可否派人來港助解決危機，猶幸最終遭錢拒絕建議，惟驚嚇度仍然十足。
此時重溫陳元論述中港兩個金融貨幣體系，「互不從屬相對獨立」嘅關係，呢8個字喺回歸以來總算體現得到，陳元亦可謂貢獻良多。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
