派特息 股價出色
2017年09月01日
八月份最後一個交易日，港股喺兩萬八千點嘅心理關口跌番落嚟，顯示市場覺得個市位高就算勢未危，都唔適宜太過急進，喺心理關口樓上就食吓胡，套吓現先。
其士豪派股價見高位
呢排唔少公司有錢派，老牌綜合企業其士國際(025) 派中期成績表，未
講成績前最亮麗嘅係管理層話經考慮集團業務、財務及現金流量狀況後，宣派特別中期息每股1.4元，涉及總額約4.22億元，股價即時彈上。睇番公司歷史，之前派息保持穩定，五年前起開始變得中疏爽，不時派吓特別息，好似12、15年都有特別股息代替末期息，呢次仲豪派過四億元，差唔多等同公司市值一成，股價有乜辦法唔彈起。
其士派錢其實有路捉，今年六月佢向喺深圳上市嘅陽光城(671) 出售成都物業及地皮嘅公司，代價淨額約約17.73億港元。呢個叫做成都半山艾馬仕開發項目，第一期已經喺2013年竣工同開售。喺協議日期，項目第二期開發及第二幅地皮之建設工程尚未開展，出售呢個項目估計將錄得收益約5億元。
由於呢個項目之前唔係幾賣得，茶友當時形容「有啲爛柴變沉香嘅味道」，既然爛柴賣到好價錢，對公司嚟講係意外賺一筆，自然有條件派吓錢，呢次佢差唔多將賺嘅錢派番俾出嚟，大小股東齊齊開心，公司仲有出售項目收回嘅現金營運，所以一啲財政壓力都冇。其士喺派息公佈後股價造好，創咗14.48元嘅新高，升幅0.8元。
近期上市公司唔少有特息派，茶友話其中一個理由係呢幾年資產價升，若然公司有買落嘢，現今身家唔少，一旦套現喺呢個水位又冇乜好嘢買，加上規管嚴格，要注自己嘢吸水或者私有化都唔容易，咁不如派高息益大小股東，收咗錢可以消費，再投資或買番股票，一家便宜兩家着。呢啲賣產分錢股家底咁厚，就算派咗錢對盈利未必有好大影響，所以除淨後股價有條件復原，咁股東就袋咗真銀落袋。
昨日除咗隻其士，招商局港口(144) 公佈中期業績，股東應佔溢利31.48億元，按年增長86.3%，每股基本盈利100.62仙，中期息22港仙，佢都另派特別息135港仙，雖然比例無其士咁多，但都算係好疏爽。招商業績靚仔兼有特息，收報25.6元，升逾6%。買特息股有兩樣嘢要留意，一係要揀本身基本因素好嘅公司，唔好只係貪息，二係不宜喺好消息後急急入貨。
中資金融股月尾都唞唞
雖然港股全日跌124點，成交逾1028億元，但以八月整月計，恒指累積上漲646點；國指累積上升467點，仲成功締造八個月連升紀錄。昨日跌市主要係中移動(941) 除淨，收跌0.63%，報83元，拖累恒指104點跌幅。四大行績後均下跌，中行(3988) 跌0.2%，報4.12元；農行(1288) 跌1.3%，報3.68元；建行(939) 跌2.3%，報6.86元；工行(1398) 跌2.7%，報5.86元，為跌幅最大藍籌，其他中字金融股月尾都都唞唞。
資金繼續喺內房股尋寶，嘉年華(996) 急升8.5%，報0.64元；佳兆業(1638) 升6.7%，報3.67元；富力(2777) 升3.4%，報18.28元。大股碧桂園(2007) 破關升咗3.4%，報10.4元。
陸羽仁
金融High Tea 舊文
來源 source: http://hdfin.stheadline.com
