等跌博短炒
2017年10月20日
八七股災爆發剛好三十周年，雖然美股隔晚大升，但係港股開市冇力隨即急挫，恒指一度跌至28000邊緣。恒指呢次下插，有傳係十九大期間北水少咗入市，又有講法係西班牙政府聲言有可能收返加泰隆尼亞自治權，成為「殺牛」催化劑。聽落有啲無名腫毒嘅感覺，只能講股市升得多就跌，恒指最多跌619點
，收市都大跌552點，若再插得深啲，就係博短炒機會。
板塊升得多插得急
恒指噚日最低插到28094，收報28159，挫552點，國企指數收報11357，下滑264點，成交金額1165億元。個別累積升得多嘅股票好似吉利汽車(175) 一度急插一成，收市都跌咗7.5%，收報24.85元；中興通訊(763) 都喺大成交下挫11.4%，收報26.15元。
港股呢排跟唔上外圍，亞洲股市呢個星期都跟美股上升，恒指力水明顯唔夠，大戶唔炒上就炒落，單日咁樣插一插，都咪話唔嚇人。個市唔夠力，其中一個跡象係無乜新板塊可以領軍，資金只能個別炒吓落後。好似早幾日大行唱好國泰，令佢股價終於升上一年高位，收市都升咗0.08元，收13.04元。國泰向好，一個理由可能係油價好番啲，令佢期油合約輸少啲錢，但公司今年累積升幅咁多，早前入咗市嘅大把本錢在手，唔會咁易震散，若然大戶想殺一輪好倉，唔排除彈一彈後再插。
國泰啱啱公佈，以國泰港龍合併結算，九月份載客263.96萬人次，按年下跌1.2%，乘客運載率下跌2.3%至81%，首三季載客量上升0.1%。運載貨物同郵件合共17.77萬公噸，按年增加9.6%。公司客運增長慢，貨運增長快嘅基調無乜大變，基本因素一般。
前一浪恒指由九月底短期低位升上來，一口氣升咗1500點，但喺29000大關前再炒上唔夠力，咁大戶不如試下炒落。由於今年大市累積升幅唔少，大戶大把本錢在手，唔排除今日會彈一彈後，大戶要插多一插，再試深少少。
以期指計，若然從高位28800點回番1000點，去番27800時，就有入市博短炒機會，當然短炒要定好止蝕位。
甘比出招恒大快上快落
呢個星期內房股一直算唔錯，兩隻大股恒大(3333) 同融創(1918) 陰啲陰啲升向高位，噚日華置仲公佈甘比再增持，一度令恒大股價爆上，曾破頂升到32元，收市頂唔住大市跌浪，報29.2元，回挫1.1元，高低位波幅接近一成。
恒大一度逆市挾上，皆因華置公佈，集團由10月4日至噚日下午，已再擲超過九億增持恒大，喺呢段時間集團購入嘅恒大股票，只佔佢喺公開市場總成交額同成交量8%。華置手持超過八億一千萬股，以噚日高位計，恒大股票帳面市值超過260億，華置買入恒大股票帳面計勁賺約140億。
至於甘比個人持有連同集團截至噚日恒大持股量計算，被視為持有合共九億一千萬股恒大股票，相當於恒大已發行股本總數約7%，以噚日高位價計，甘比個人持有連同集團嘅恒大股票市值超過291億元，已經超過當時華置市值 (約260億元)。
有接近當事人消息話，甘比透過上市公司同個人揸重恒大股票，都係商業考慮，睇好公司基本條件，但炒股唔係拍拖，不會盲目追捧，據聞佢都會因應整體市場環境、成本利潤、集團財務狀況做買賣決定。等恒大股價達到滿意同吸引水平，會考慮變現部份恒大股份，仲話到時不排除就有關變現收益或出售所得部份款項，派發股息俾股東。
華置買入恒大，依家已經利大過本，可以話賺到笑，不過如果呢啲股票唔係長揸，就要研究點樣退市。本來賣股係唔需要預告，消息話適當時間賣股，一個可能係話俾華置股東聽，遲啲就會食胡。另一個可能係恒大咁樣挾上，唔排除有人做咗淡倉，咁講係要同淡友打心理戰？
陸羽仁
金融High Tea 舊文
來源 source: http://hdfin.stheadline.com
