財經評論：女人街擺檔vs賣樓
■晉海II首批227夥開價時號稱餘下單位出年賣，結果隔一周就反口加推。 資料圖片
旺角女人街擺檔賣數十元雜貨的小販、與發展商推銷數百萬物業，促銷手法其實差不遠。
女人街小販戴住咪高風示範魔術銀包、電熱封口機或者紅酒塞套裝等雜貨時，對白大概這樣：「各位鄉親父老，小
弟今日淨喺帶咗公司最後一箱X（任何貨品）嚟，賣完就無曬㗎喇！平時喺啲大商場，X就賣成888蚊嘅。今日你估嚇賣幾錢？788唔收你、688唔要你。聽清楚喇！講價錢喇！今日88蚊咋。你無聽錯我無講錯，100蚊有找呀！只限今天！」，然後檔攤前總會有師奶舞著紅衫魚搶貨。事隔數日，師奶再走過檔位，X還在賣「最後一箱」，賣極都有。
聽發展商推廣時，你或者覺得對白熟口熟面。好些本地龍頭發展商在樓盤宣傳初期，不時會講出一個所謂的「樓花期銷售目標」，嗌到聲嘶力竭、夠數好快收手，然則達標後，所謂的封盤動作就飄移至無影，翌日繼續賣樓。
最近一宗銷售目標神隱案件要數日出康城晉海II，首批227夥開價時號稱餘下單位出年賣，隔一周就反口加推，理由是「盛情難卻」。類似「徇眾要求」打破原訂計劃極速加推的個案，追溯過去還有何文田天鑄、元朗Grand Yoho2期等。
至於最誇張要數3年前發售荃灣環宇海灣，全盤1,717夥，在賣樓前誓言旦旦該年銷售目標屬800夥，到數後就再無此計劃，到年尾幾乎沽清全部單位。
當然，姣婆遇著脂粉客，準買家如女人街師奶般揮舞支票求買樓，發展商順理成章歸咎買家熱情融化他門，只好加推單位應市。這樣看來，發展商願打、買家願捱，那怕一方光明正大反口，銷監局成立多年從來未發聲，塘邊鶴除了聳聳肩，還有甚麼可做。
記者：陳東陽
財經評論 舊文
來源 source: http://hk.finance.appledaily.com
