股市癲度有得計
2017年11月23日
港股連升兩日，一口氣爆上三萬點大關，升得咁急，有啲慢牛變快牛感覺，有保守茶友就出嚟示警，話樓市股市咁升法，玩得幾耐令人擔心。
股市咁升，唔係個個茶友都搵到食。有茶友慨歎，佢名下組合股票喺呢輪升浪冇乜得益，去到噚日先至有隻滙控(0005) 叫做稍為跟上，但距離今年高位仲
有距離。可能因為佢少買科技股升得少，所以特別冷靜，所以佢就話，依家個市有啲九七年股樓齊炒嘅味道喎。
樓市癲過股市
茶友喺九七狂潮時，已經係有樓有股之人，佢話當時市區樓價一萬蚊一呎，恒指升到17000點，加埋當時失業率跌到2.5%，的士司機人工去到兩、三萬銀一個月。睇番依家，市區二手樓價去到兩萬蚊樓上，新樓仲更加貴，恒指升到去30000點，失業率跌到3%，係咪已經有啲焦焦哋嘅感覺呢？
茶友溫故知新，的確有助大家去量度吓本地資產價格去到乜水平。如果以依家樓價為例，以20年高位比較升咗一倍，同股市升幅差唔多。
如果話樓價20年升一倍，本來唔可以話係太誇張，但因為九七年樓市狂潮癲度極強，所以依家樓市癲度都好高。
如果叫陸羽仁去評估，依家本地股樓資產價格癲度，樓價差唔多已經接近九七時八、九成，新樓甚至已有過之。至於股市癲度就仲有距離，大約係七成左右。
點解樓價同恒指升幅睇落差唔多，陸羽仁覺得癲度有唔同呢？最主要係樓市結構同股市結構唔同，樓市依家新盤主導，同過去二手樓主導唔同。受辣招影響，依家購買力谷晒去有發展商做二按嘅新樓，一、二手樓差價好大，新盤偏貴，令樓市癲度增加。
相反，股市過去二十年結構大變，中資股變成主導，尤其呢浸升浪主要係由騰訊(700) 帶動，其他傳統藍籌其實唔係咁高，就以呢排升得好啲嘅港交所嚟講，噚日雖然大升9.4元，收報254.2元，但同佢喺2015年創出嘅298元仲差近兩成，從估值而言只能講唔平，但未算好癲。
三萬點關最好打下椿
當然，股市次次爆破情況唔同，水平都有差別，依家股市癲度就算只有九七年七成，唔代表佢必定唔爆，做個評估一來係俾個參考，二來係表示若然呢個位爆破，咁將來返家鄉路程都冇咁遠。
依家評估個市癲度，另一個現象係升勢未全面，冇出現雞犬皆升亂象，好似周一指數爆升，但創一年新高股份唔過一百隻，反映炒作資金仲未係舖天蓋地而嚟。噚日大市都係一樣，急升大股好似騰訊、平保(2318) 都係上完就回調，顯示資金會食胡調整。
噚日大市爆升，一開市已升穿三萬點關口，其後一度逼近30200點，收市仍站穩三萬點以上，創逾10年高位，收報30003點，升185點，國企指數收報11958，升84點，成交金額1574億元。
熱炒股騰訊(700) 回吐，跌0.74%，收報426.8元；中國平安(2318) 都跌2.4%，報收84.1元。另外半新股閱文(772) 大插4.4元，收報88.55元，易鑫(2858) 低見6.43元後，彈番上7.38元收市。熱炒股回調，藍籌中變半冷嘅大笨象滙控(005) 升1.8%，收報76.95元。
照個市睇如果喺三萬點打吓椿，炒吓落後，咁好似中環茶友中有畏高症者，就會冇咁擔心。
陸羽仁
金融High Tea 舊文
來源 source: http://hdfin.stheadline.com
