魚樂無窮：今年學懂四件事
■要在股市生存，一定要長期保持高度警覺性，切忌被勝利沖昏頭腦。資料圖片
2017年餘下兩個交易日，恒指全年三成升幅應冇走雞，戰友們埋單計數，相信只係贏多定贏少嘅問題。
當然，要在股票市場生存，一定要長期保持高度警覺性，切忌被勝利沖昏頭腦。趁個市靜靜地，同大
家分享嚇今年學懂嘅幾件事。
1.強者可以越強。恒指升幅由幾隻大藍籌照起，股王騰訊（700）差不多由頭帶到尾，如果倉位冇佢，要跑贏大市極度好難。同一時間，升市經常出現千股下跌情況，弱股由頭弱到尾，揸住佢哋等運到，等足一年都等唔到。
2.北水非常瘋狂。由汽車股吉利（175），到內房股恒大（3333）、融創（1918），再到最近嘅金斯瑞（1548），全部累積升幅倍倍聲，用基本因素計，肯定一早沽清，甚至買唔落手，對付癲佬，你要比佢更癲。
3.高息股繼續旺。美國不停加息，但香港紋風未動，樓市投資回報低，債市位高勢危，高息股有價有市，賣產嘅領展（823）突破70蚊大關，恒生銀行（011）就嚟兩舊水，計好股息率入場，勝算依然高。
4.細價股冇運行。粉塵爆破後，莊家全面洗牌，更掀起股仔DQ潮，眾多概念之中，唯一有投資價值的，相信只餘下GO股了。有乜好介紹？繼續跟實本欄推介吧，明年再見！
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com
