金手指：城規會「天堂」冇人吼？
■近十年來，觀塘區被視為香港其中一個創業聖地。 資料圖片
孫柏文呢排喺英國讀緊「數碼新聞」嘅課程。其中，要學點樣present啲數據。例如，如果香港政府開放數據，將每年所有新嘅商業登記證上所填上嘅地址公佈。我就可以整個地圖，用Google Map做底，
每個地址打粒細點。到時，就會見到各處嘅密集度，一眼就知香港人邊區有最多創業。
當然，呢個數據政府冇公開。不過由我近十年來聽啲創業朋友傾，如果係寫字樓（即唔係零售、餐飲），香港其中一個創業聖地，就肯定係觀塘。我點解無端端喺度諗呢樣？我問大家，想唔想香港未來、未出世嘅企業，可以有多啲？
點解政府聽學者、政務官、專家，造成城規會咁多年，香港人創業，唔係一窩蜂咁去啲瘋狂俾規劃嘅新市鎮「天堂」？而就選租新樓，畀貴租都要去啲舊區？其實，有個好重要嘅原因，就係喺啲舊區嘅商業樓，有好多好多業主，作為租客，啲業主互相競爭劇烈，鬥到七彩。
咁啲城規會新市鎮「天堂」呢（聽聞好快會為洪水橋落筆）？以前，我喺將軍澳選過區議會，就喺將軍澳地鐵站上，有棟近乎當區居民都唔知存在嘅寫字樓商廈。全區唯一，十室九空，對當區冇供獻。不過因樓下超大商場都係同一業主，唔care樓上冇人用。
將一個區嘅所有商業樓，畀一個發展商、業主。冇錯，城規會抱住「有就夠」，而唔係引發業主間競爭。DO、AO會覺「管治方便」，賣地時為庫房帶來「壟斷性」水平收益。代價，就係當地人唔會喺嗰到創業。又一失敗規劃。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com
