大棋局：港股今年大茶飯
■據投行及證券商估計，H股全流通會為港股總市值增加9,500億至2.6萬億港元。 資料圖片
最近內地有個風向要留意，就係關於公有產權同私有產權之爭。共產黨自己中過伏，甚麼大鑊飯、做又三十六、唔做又三十六已成為烏托邦情懷的歷史。但最近有內地學
者重新挑起公有制同私有制之爭，只反映一件事，就係中國要唔要開放，尤其國企要唔要開放畀外資進入。先講結論，中國開放事在必行，H股全流通為試點，配合上星期提及的美國萬劍歸宗VS中國吸星大法，港股今年有大茶飯。
在內地註冊，然後在香港上市的叫H股。H股有部份股份只賣畀境內特定投資者，這部份叫內資股。內資股只可以在境內以over the counter轉讓，可以理解為類似禁售股。所謂H股全流通，即係將內資股轉成H股在香港買賣。用一句話概括，就係將原本唔流通的內資股搬來香港吸水。
香港主板及創業板共有253隻H股，相當部份係國企，就算唔係國企，暗啞底都同國企關係千絲萬縷，所以乜嘢人揸內資股大家心中有數。H股全流通只係一個開始，將來會有更多開放改革，此為公有制與私有制之爭的大背景。
中美相鬥香港得利
共產黨信奉馬克思的唯物辨證法，量變會導致質變。如果中國只如津巴布韋小國，可以閂埋門玩90年。但中國已躍身成為世界第二大經濟體，決定了中國必須改變，無法閂埋門自己玩。古時的封建制，係分封田地畀諸侯；新時代新玩法，係分封企業畀諸侯。
當中國必須要開放，就意味會削弱分封企業的權力，於是同股不同權、派黨委入上市國企便應運而生。
美國加息、縮表，美元回流，這是國際大氣候。中國應對之策，要利用香港獨特優勢吸四方之水，將錢留下再搬上去，這是中國本身的小氣候。據投行及證券商估計，H股全流通會為港股總市值增加9,500億至2.6萬億（港元，下同）。股份解禁，即係供應量多咗，股價理應受壓。但既然要吸水，當然炒高先吸。H股全流通中長線部署，係希望將股份整合，增加H股股份的流通量，方便各類指數基金追蹤，目的都係引外資接盤。
2017年全球新股IPO集資金額，香港排第3；全球股份集資金額，香港排第5；港股總市值36.3萬億，全球排第7。更重要係，在香港吸錢，係吸全世界嘅錢，而且收港幣可直接換美金，咁梗係要借香港吸水。大國之爭、政治相鬥，離我哋平民百姓太遙遠，但察其動向可以順勢食佢一水。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com
