平保紅底預言自我實現
2018年01月23日
美股上周高收，港股高開後投資者一度表現審慎，令指數回落，但到下午就再升過，動力繼續係內地A股造好，上證指數收升超過3500點，創業板指數升幅仲大啲。
新一年似乎中外股民對A股睇法都轉牛。唔少外資認為內地經濟經過一輪調整，已經到咗較為堅
實基礎，特別係民企始進入上升循環。內地股民則憧憬今年A股入摩，外資會陸續增長，所以資金主要都跟住A股去炒。
中資股帶領呢期升浪，除咗騰訊(700) 外，平保(2318) 係另一隻強勢股，昨日佢收報96.15元，股價再創新高，距離紅底股只差幾個百分點，只要市況持續，隨時今個星期就已經「升呢」。
港股學足內地炒大股
平保喺過去一年升勢持續，估計同內地資金愛買有關。A股股民近年轉性，愛炒大股，最明顯係隻茅台，愈升愈有，強到已經無朋友。內地傳媒做咗個統計，今年資金興炒金融業、地產建築業、能源業，是近期港股上漲的三大引擎，喺中港兩地都有上市的成份股中，建行(939) 、中行(3988) 、工行(1398) 、交行(3328) 、中石化(386) 同平保今年以來累計漲幅都在10%以上，可見強勢。當中內銀股有追落後味道，但平保去年已經跑贏大市，今年升幅未停，係可以媲美騰訊的強勢股。
平保走勢可以拍住股王，其實兩者有啲相似，一是大家基本業務都唔錯，騰訊喺廣告、遊戲收益持續增長，平保喺壽險增長亦都好驕人。同樣地，騰訊大炒分拆，平保都一樣有唔同概念的附屬公司可以拆出來，O依家市場最矚目當然係預期第二季上市的陸金所，好多人因此都估計成事前，佢會問鼎紅底股，當好多人都咁睇，就學咗特首話齋，係股民間形成咗共識，吸引咗資金不斷流入，成為自我實現的預言。
喺大市升勢集中未變下，騰訊昨日再升1.7%，收報460元，股價創歷史新高；平保則升3.1%，收報96.15元，兩隻股份合共推高恒指101點，如果手頭無呢兩隻股份，咁升勢基本上已經唔關事。有中環茶友話，如果要跟住內地氣氛炒，又怕兩大重磅股貴，可以留意吓海螺水泥(914) 、復星醫藥(2196) 同招銀(3968) ，呢幾間公司的A股近日都獲唱好，好似海螺作為行業龍頭，產品價量齊升，後續產能持續拓展，有望帶來業績新增長，所以有多間大行唱好。呢幾隻股份其實累樍升幅都唔少，不過要買強勢股，基本上都無乜平貨可執。
中海宏洋炒阿媽愛錫
除咗兩大火車頭，內房股繼續炒個別，最搶眼係隻中海宏洋(081) ，大升近18%，收報5.08元；富力地產(2777) 升10%收報23.25元；華潤置地(1109) 漲6.4%收報30.1元。中國海外宏洋年前被中國海外收購，早前公司建議進行二供一供股，發行11.41億股，控股股東中國海外發展(688) 包銷；供股價4.08元，所得淨額46.09億元，其中約32.49元擬用於償還債務；9.22億元用於業務發展；餘額撥作一般營運資金。
中國海外宏洋被中海外收購後，嚴格來說未大力炒作過，公司O依家股價略高過淨值，但佢嘅土儲相信有唔少隱藏價值，睇佢供股理由其實無乜逼切需要，有人估計母公司唔介意借機會增持。中海外市值3300億元，中海宏洋市值連埋未來供股都係200億左右，郁起上來易好多，既然阿媽咁愛錫肯包銷，所以供股權出世，股價就來個爆升。
陸羽仁
金融High Tea 舊文
來源 source: http://hdfin.stheadline.com
