智取大市：利好因素要記實
■港股只要中線調整不太過份，長遠仍值得候低吸。資料圖片
說好嘅單日大升市，竟然喺途中冇調整過嘅情況下出現，假如今朝再快速挾上，按原先本欄劇本，不妨進一步減持港股，令自己去返輕身水平。呢嚇未知係咪之前講嘅最後一升，但再急衝就預計有龐大獲利盤湧現，不妨再減持，然
後用三兩日觀察市況先決定後向。
帶返頭盔先，上述嘅最後一升，係講緊一至兩季嘅中線表現，並唔係長線預測，更加未係時候判斷股市係咪牛轉返熊，睇牛熊周期，不妨用基本因素同圖表一齊分析。
最近一年嘅升市，集中於新經濟股、內房、汽車、醫藥、商品股，而去到近期內銀股同內需股都有升，但經濟周期股明顯未升到足夠反映大型上升周期，最多都係牛市中途估值，未到高𥧌。長遠會唔會到高𥧌嘅關鍵，就係睇市場有幾信呢個經濟復蘇係堅的，數據又能否deliver到，暫時睇機會高於一半。因為之前講過，零售股嘅銷售數據、產品加價幅度，曲線話畀大家知，一切不簡單。
之前講過恒指月線圖RSI大幅突破80後嘅走向，股市往往仲有多一浸大型升浪。大家Keep in mind上述利好因素，只要恒指中線調整不太過份，長遠仍值得候低吸。不過，港股調整三幾千點亦唔出奇，大家始終要小心。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
