濠賭股係時令菜
2018年01月24日
港股呢排升到停唔到，A股昨日喺內銀股帶力下再漲，推動港股愈升愈有。臨近U盤階段，指數再爆多一程，高收537點，大有挑戰33,000點之勢，個市一口氣係咁升，人人都覺得累積升幅已經好大，但又你眼望我眼唔敢落車。
內銀開始炒前景
金融板塊今
年都話咗有運行，內銀A股昨日爆升，帶動滬指再直逼2015年12月以來新高。上證指數收報3546，升45點，深證成指收報11555點，升42點。A股咁勁，帶動恒指氣勢強勁，創歷史新高32930，並以新高位收市，漲537點；國企指數收報13490，上升285點，成交金額高達1980億元。
平保(2318) 昨日成交罕有多過騰訊，係累升下好淡爭持激烈，一度倒跌後收市升0.26%，報96.4元；騰訊(700) 再升3.2%，收歷史新高報474.6元。不過，昨日最威係內銀股，建行(939) 急升4.4%，收報8.77元；工行(1398) 上揚3.4%，收報7.33元；中行(3988) 漲3.6%，收報4.56元。內銀股中，被視為質素最好的招商銀行(3968) 發表業績快報，2017年股東應佔溢利701.5億元人民幣，按年增長13%，呢個數字表面睇唔算好亮麗，不過，內銀股普遍估值唔高，加上o依家係炒佢哋前景改善，所以招行數字都叫做交到貨。
濠賭股昨日發威，理由係新公佈嘅業績靚仔，好似永利澳門(1128) 上年第四季度業績，純利1.79億美元，按年增長284.5%。經營收益12.3億美元，上升47%，立即就觸發咗股價大升。濠賭股表現好，同業績有關之餘，我早前已講過，另一個上升理由係季節性因素，因為逢農曆年前，都係濠賭股醞釀炒作嘅日子。計番o依家距離過年仲有唔夠一個月，訂房同房價數字開始出台，開始有啲炒作材料，今年中港經濟表現唔錯，市道需求應該向好，春節生意應該有苗頭，既然個市要搵嘢炒，濠賭股業績對辦，自然吸引資金落注。
計準時間逐次落注
濠賭股自從2014年爆升後因為中央打貪急挫，搞到不少股民見財化水，投資者對呢個板塊估值無咁進取，要睇過業績先至落注。澳門博彩生意好做無容置疑。有中環茶友月前去過柬埔寨嘅金界(3918) 娛樂場，規模同澳門真係相差好遠，皆因澳門有內地客源源不絕進貢。相比之下，柬埔寨就無澳門咁有近水樓台嘅優勢，o依家喺澳門做博彩生意，連酒店住房都賺番一筆，喺博彩中心來講，真係得天獨厚。不過，澳門賭牌幾年後陸續到期要檢討，買佢哋要考慮呢個因素，比較穩陣玩法係鋪鋪清，睇住數字同跟住季節因素嚟炒。炒呢個板塊好似食時令菜，要逐次睇佢係咪當造，好似呢輪數字靚，大環境又就，咁就可以落場趁墟，到咁上下時間就計數食胡，再等下一轉睇睇賭率至決定落唔落注。
茶友講開金界，佢話呢間公司比較低調同冷門，但佢多年前來香港上市，當時只係一隻賭船，集資後開始搞酒店娛樂場，發展日增。佢最大本錢係擁有首都金邊範圍來多年的獨家博彩經營權，只要當地政權穩定，咁佢生意仲有排做。金界嘅發展同柬埔寨掛鈎，若然當地旅遊業愈成功，吸引愈多旅客去金邊，咁佢生意自然就水漲船高。柬埔寨被西方批評政權唔夠開放，最近大選政府仲解散埋反對黨，所以總理洪森政權似乎好難有人挑戰到。另一方面，柬埔寨近年大力吸引製造業設廠，o依家又大力呼應中國嘅一帶一路政策，金界係金邊做獨家生意，雖然件肉無咁肥，但亦都無澳門咁有六間公司爭食，所以股價都慢慢上。
陸羽仁
金融High Tea 舊文
來源 source: http://hdfin.stheadline.com
