Money Walker：冇錢者的投機選擇
■全球升市下，資金唔多嘅投資者，可以選擇ETF。資料圖片
勞福局長羅致光日前被指建議借學生貸款買iBond，令筆者回想起已故投資大師科斯托蘭尼（André Kostolany）一句「沒錢的人，必須投機」嘅名言。
古有科斯托
蘭尼，今有羅致光，鼓勵他人投資出發點絕對係好，事關量寬實施多年，全球資產價格騰飛而大部份人嘅人工僅見龜速增長，加上樓價租金與工資極脫節，故即使通脹乏力，都絕對有透過投資為資本增值嘅需要。但可悲在叫冇錢嘅人投資，邏輯上與「何不食肉糜」類同。
虛擬貨幣誕生，正好填補投資市場上小注博發達嘅缺口，初面世時近乎一文不值嘅虛擬貨幣，係冇錢嘅人都能夠負擔嘅投資選擇，難怪青年失業情況嚴重嘅南韓，對虛擬貨幣陷入「全民皆幣」瘋狂狀態。可惜南韓政府頻頻出手加強虛擬貨幣投資監管，拖累全球虛擬貨幣價格全線向下。
既然買虛擬貨幣博發達捷徑斷裂，冇錢者只能回歸現實，可惜每手入場費只需一萬蚊嘅iBond已絕版冇再出，不過全球升市下冇錢者想投資又得雞碎咁多本金，都唔係無路可走，事關世上仲有牛熊證同ETF。牛熊證唔駛多介紹，而ETF除咗盈富基金（2800）外，仲有其他入場費較平選擇，例如恒指ETF（2833）、領航富時亞洲（2805）同南方東英原油（3135），入場費三幾千蚊且較不少細價股穩陣，唯一要留意係本港大部份ETF成交唔算活躍。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
