大棋局：這個牛市不簡單
■貨幣寬鬆盛宴即將落幕，但股市卻越升越有，如果今次牛市係由政府主導就不容小覷。資料圖片
一個奇怪現象，聯儲局已開始加息及縮減資產負債表，歐洲央行露口風QE即將結束，日本央行表面話保持寬鬆又被人捉到靜靜雞減少買債，全世界都知貨幣寬鬆盛宴即將落
幕，股市卻越升越有當央行透明。特朗普多次在Twitter宣揚股市上升功勞在己，好似道瓊斯工業指數代表佢嘅政績。如果今次牛市係由政府主導就不容小覷。
今次牛市的領頭羊美國股市，有兩大特徵。其一，炒所謂EPS行情。由於美國稅改通過，預期公司盈利會改善，加上估計美元回流上市公司會回購股票，因此股價要上，即係賭預期。其二，炒數字貨幣概念。柯達，一家幾乎破產的百年老店，因為跟唔上時代而委靡，近日宣佈推出自家虛擬貨幣，股價馬上一日爆升120%，即係賭潮流。
上述兩點有主次之分，賭預期係主，賭潮流係副。由於縮表會造成貨幣緊縮，因此需要美元回流對沖。在這個意義上，賭預期並非純粹炒概念，而係政府會落手落腳去做，有冇炒突係另一回事。
香港成中美大戰戰場
至於賭潮流，已經有2000年科網泡沫味道，當年一間公司擺幾部伺服器就話係科網公司炒一轉，今日間公司話自己搞虛擬貨幣、搞區域鏈又炒一轉，只係順勢炒概念。但由於大背景是全球QE盛宴落幕，要美元回流，就代表要其他國家嘅銀紙流向美國。QE時代是增量，大家一齊印銀紙，大家齊齊升；縮表時代是存量，在現有資金池內鬥搶，即塘水滾塘魚。
既然美國要搶美元回流，中國當然不會坐以待斃。
留意港股近期動向，港交所（388）想修改規則畀阿里巴巴下半年來港上市；平保（2318）旗下的陸金所，估值達600億美元又要嚟香港上市；小米要嚟香港上市；史上最大規模IPO沙特亞美石油公司，傳中資有意入股，香港力爭其來港上市。全部都係牛龜咁大隻嘅股票，成交量少啲都接唔住。於是放北水南下，港股現時每日成交都1,000億以上。中國的手影很明顯，當美元回流成勢之際，要將錢留在香港再搬上去。
上海即將推出以人民幣計價的石油期貨，用意一樣，只係內地資金進出有限制，無咁快成事。香港係食四方飯之地，利用香港獨特優勢快靚正。所以今次會係一場美國萬劍歸宗VS中國吸星大法，而戰場就在香港，這是主軸。期間會有各種賭潮流的股票炒一轉，這是側支。
Mr. Tregunter
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com
