【實力取勝】點睇狗年股市（陳承龍）（第165期）
2018-2-22 9:00:40
小弟一向係大好友，認為做淡好難搵食，因為做淡跌到零，都只係賺100%，但做好就升無限，小則搵餐飯，大則會發達㗎，所以只要實際投資環境許可，小弟都係睇好嘅。新年伊始，梗係要展望一下來年個市會點，
小弟成日都同大家分享我基金經理點睇，包括喺呢個欄或者網台，今期集思廣益，喺呢度分享下我老友正大師個基金friend點睇後市。
正大師呢個基金界朋友，已經做咗超過20年，好有經驗，暫且叫咗做基金經理A。基金經理A認為今年開局同2015年好似，當年1月大好，2月就突然A股化，集中三四線股票洗倉，然後下半年就收復失地，今年情況就由細股洗倉變大股洗倉，其實今年加三次息定四次息，都四係差25 點子，唔似見得咁大件事，所以基金經理A覺得今年似1987股災多啲，因為有通脹其實係好事。基金經理A認為，1987年股災後，1988年所有指數都創新高。1987、88同2018年嘅共通點，都係新聯儲局主席上場，1987年係格林斯潘（Alan Greenspan）做咗場好戲，2018年就係鮑威爾（Jerome Powell）。所以基金經理A喺低位時（佢同正大師講嘅時間大概係2月7 日）唔會走頭認輸，因為指數跌得又快又急，反彈嘅速度就會更快，投資倉位嘅去留，可以等反彈再做決定。最後基金經理A覺得暫時冇系統性風險，所以，喺低位加注博開大。
小弟打呢段稿嘅時間，其實團年飯都未食，篇稿見街之時，可能個市已經大彈，又可能繼續差落去。正所謂呢，投資市場千變萬化，你哋見杜指一晚轉十幾二十次燈都得，可見得佢有幾波動。賣花讚花香，想知最貼市資訊同有乜好炒，梗係睇策略王直播室啦。
實力取勝 - 陳承龍 舊文
來源 source: http://www.winmoney.hk
