智取大市：忽視市況操盤法
■在通脹預期下，內需股受惠，康師傅昨日逆市升。互聯網圖片
美國聯儲局議息紀錄講到，資源利用率進一步提高以及工資壓力變得更加明顯，通脹將逐步上升，並將會達到2%中期目標。明顯係經濟太好而提升加息步伐，重點反而係：資源利用率高、通脹回升。呢個劇本之下，大藍籌自然
要捱沽，但商品資源走勢相對好，因為連聯儲官員都估計資源需求會大，呢類股會秤先少少。而內需股亦有康師傅（322）、潤啤（291）逆市升，正正因為通脹預期。雖然係跌市，但一連串消息之下，大市及個股反應合理不過。
正因為加息憂慮打斷港股反彈氣勢，加上之前一日市場氣氛突然升溫，短線客一時三刻消耗購買力，令港股突然失去承接，睇嚟港股博反彈浪潮已完，可能進入難以捉摸嘅整固期。跟市走嘅主流股份，已非最佳選擇，不妨換入被低估嘅增長型二三線股，以及候機趁早吸納有利好消息嘅主題股份，玩法要微調，被低估增長型二三線股稍後會介紹。如果手持主流股份等沽，唯有等下次氣氛興奮嘅時候沽出啦。
除非再有流動性危機，否則無論個股定係整體市況，單日跌凸咗嘅話，下一日相信會好返啲，拉勻都係冇乜trend，若嘗試捕捉港股升跌，就會非常難捱。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
