Money Walker：大市反彈三大因素
■市場聚焦加息速度，因此儲局官員有關加息之講話，對大市影響程度不能掉以輕心。資料圖片
環球股市近日齊齊震散，其實各國瘋狂升市多時後股市估值已大升，所以出現大跌市並不令人意外。事實上，跌市並非呢兩日嘅事，多地股市早於兩周前已開
始有序下跌，上周五公佈嘅美國上月工資升幅創近9年來最大，導致市場對通脹升溫憂慮加劇，只不過係為今輪調整提供多一重原因。
當呢幾年環球升市三大支柱，即係股市估值低廉、低息長期維持，以及經濟與企業盈利雙雙改善，當中前兩大支柱都有所動搖，美股單日蒸發千點收場其實並不誇張，而美國以外股市跟跌亦十分正常。
不過講到底，除咗今輪跌市會跌幾多千點，上述升市三大支柱會否從此瓦解更需關注。首先，如果今輪調整唔夠深，環球股市跌完估值都唔算平，咁後市將失去估值低廉呢條支柱；第二，如果加息預期今次升溫後不再降溫，亦即係連第二條䇛市支柱都冇埋，咁後市就只餘下企業盈利呢一條升市支柱。一旦真係咁唔好彩，未來䇛升環球股市嘅正面因素真係由三個減少到得返一個，大家都唔好期望今輪調整過後，股市可以恢復返之前咁快速嘅升市步伐。
另外，值得留意嘅係，隨住市場更為聚焦加息速度，外圍經濟數據與央行官員講話兩者，對市場氣氛之左右程度肯定會高於以往幾年。即使係儲局入面較不重要嘅官員有關加息之講話，未來對大市影響程度都不能掉以輕心，而美國工資升幅同核心個人消費支出指數（core PCE）呢兩項重要通脹指標，肯定需要加倍注視。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
