【實力取勝】有時真係做直播做到嬲（陳承龍）（第169期）
2018-3-22 17:16:57
策略王直播室近排收視高企，日日都有成兩千人喺度睇live，小弟首先喺度多謝大家咁鼎力支持。有呢個成績，全靠幕前幕後嘅同事喺度努力，並唔係小弟一個人嘅功勞，希望我哋可以一步一步咁走近目
標，目標就係……大家明㗎啦，小弟都無謂講到咁白，你哋明嘅。
做直播室都幾開心，一邊做節目一邊炒股，贏就大家一齊，輸就盡量唔好輸，小弟都係一個大老散，根據公開資料、資訊乜都買一餐，買中就贏錢，好彩嘅就贏大鑊，手氣差嘅咪輸少少走人咯。大家要記住，《港股策略王》直播室其實係一個炒股真人騷節目，小弟陳承龍、圖太郎、Joe爺同耐唔耐客串下嘅正大師，都係分享平時買賣股票嘅心理掙紮，並唔係話真係畀咩貼士大家，以圖太郎為例，佢粉墨登場之前正大師已經提醒過佢，「所有圖表派最終都冇好下場」，正大師又唔係咒佢，只係講一個道理。小弟相信，唔少圖表派都係有料到，但曝光太多，圖表派哋思維快，一日睇好睇淡都來來回回幾次，連策略王同事都跟佢唔足，試問讀者又點跟呢？小弟相信，雖然圖太郎炒股係唔夠我叻，但分析圖表嘅功力，係我見過呢輩人最耍家嘅。
不過有一樣，小弟就好鬼嬲。部份fans跟買之後，跌幾格又話GG，唔升又話我幫人派貨，嬲到我3月20日喺下午時段發火狂小，壹家壹品（8101）狂升45%，收0.36元，好耐之前，8101仲未改名，小弟叫大家0.1元左右介入，一個二個又話妖股又乜又物，到最近寶能系姚建輝瘋狂掃貨，增持到8.61%報埋會，一公布消息後升到爆廠，稍稍回一兩日有少部份人又話GG妖股，大佬呀，股票幾好都唔係日日升㗎嘛，唔通騰訊（700）一日跌2、3%又GG咩，激到我呢！堅嬲㗎嘛。0.1元買咗8101乖乖坐到依家，咪升兩倍咯，呢啲咪叫發達咯，生活咪就係咁改善咯，近排推介嘅國際娛樂（1009）、Teamway（1239）都係呢啲好嘢嚟㗎，唔信嘅咪唔好信咯，有貨快啲沽曬去呀，小弟多多都接，仲會鎖埋倉呀。
呢排小弟深閨，有晚翻睇劉德華主演嘅《門徒》，戲入面其中一段，係吳彥祖問佢賣白粉同賣煙仔有乜唔同，劉華嘅答案令小弟我有同感，有興趣嘅朋友，自己摷返套戲睇啦。
實力取勝 - 陳承龍 舊文
來源 source: http://www.winmoney.hk
