神材整合候低撈
2018年03月22日
港股昨日先升後回，似乎係提前回應美國加息，通常喺加息前後股價造好的宏利金融(945) 昨日就升咗三元，收報148.7元。
今次美國議息，市場預期佢會調高利率，關鍵主要係新主席鮑威爾對通脹同息口會放出乜嘢訊息。鮑威爾新官上任，他的處境同耶倫
有啲唔同，耶倫正處經濟復甦初期，產能仲未用盡，通脹威脅唔大，央行只要唔打擾，經濟循環自動波向上。
平保績優趁勢食胡
O依家美國增長勢頭雖然未扭轉，明顯產能開始有限制，最明顯係失業率回落到近年低水平，薪酬上升有加快跡象，未來成本上升壓力多咗，喺維持增長同時，可能要付出通脹付價。美國暫時通脹率唔算高，央行仲有空間去維持增長。不過，如果通脹率再升，央行就要喺增長同加息壓抑通脹間作出選擇，決策難度就會增加。鮑威爾點去應付呢個難度逐漸增加的工作，係外界關注他發言的焦點。
美息揭盅前夕，恒指一度造好，最多升逾300點，但午後獲利回吐湧現，大市掉頭回落。呢兩日大市跌得多就升，又或者升得多就跌，似乎係美國議息前的忐忑狀況。
恒指昨日收報31414點，跌135點；國企指數收報12521點，下滑75點，成交增至1529億元。幾隻績優股價出現回吐，吉利汽車(175) 盈利升一倍，股價反而急跌6.2%，收報25.8元。平保(2318) 公佈業績靚仔，兼且大加股息一倍，股價開市飆上94.8元，交投一度超過股王騰訊(700) 。午後借住管理層澄清無明確講過今年會分拆陸金所，股價掉頭回落，急跌3.2%，收報88.3元。
平保盈利增長遠勝其他內險股，加派股息相當慷慨，反映管理層對前景相當有信心。至於分拆陸金所日程還未確定，但相信已擺上管理層日程，股價回得急，相信係因為部份低位撈咗貨者回吐食胡。
收市後，「股王」騰訊派發2017年成績表，表現遠勝預期。全年純利715.1億元人民幣，按年上升74%；每股基本盈利7.598元；派末期息0.88港元，按年增加44.3%。市場平均預測騰訊全年多賺逾60%，至675億元。
內地不同部委重組，在此之前國企已開展整合潮。中國建材(3323) 和中材股份宣告的合併大計，呢個星期已獲證監會批准，這意味着「中國神材」即將出爐。今次合併換股比例為每1股中材股份股票，可以換取0.85股中國建材的股份。
中建材系炒深度整合
合併完成後，中材股份將從港交所退市，股份將被註銷。整合後，被喻為「神材」的中國建材會成為內地最大水泥公司，水泥總產能將達到5.3億噸，成為全球最大水泥生產商。中材集團旗下亦有多間A股公司，包括中材國際、寧夏建材、中材節能、祁連山、中材科技、天山股份、國統股份，中國建材旗下A股公司包括北新建材、中國巨石、洛陽玻璃、瑞泰科技。
中國建材完成股價合併後，下一步要對旗下15間上市公司，進行深度業務整合。由於憧憬整合會提高效應，部份個股近期走勢強勁，如瑞泰科技上周大漲近兩成，中材節能上周大漲逾13%，洛陽玻璃上周大漲逾11%，形成一股整合帶動升浪。
對於中國建材併購大計，外資行看法無咁樂觀，在看好合併的協同效益下，認為股價已經反映。年初長三角沿江水泥熟料價格下調，一度令中國建材股價大插近一成。不過，睇番佢股價喺八元以下水平開始會有支持，喺合併完成後，可能有部份買咗中材股東換股後沽貨帶來壓力，股價昨日跌咗3%，收報7.98元。未來系內不同公司會因應市場環境有唔同表現，由於未來有合併效益帶動盈利，整體方向應該有利，如果股價再插下，可以低吸炒反彈。
陸羽仁
金融High Tea 舊文
來源 source: http://hdfin.stheadline.com
