魚樂無窮：反高潮陸續有來
■毛記上市，相信吸引唔少fans捧場，呢班很少甚至從未染指股票的人，或會打亂正常熱爆新股的節奏。互聯網圖片
乜嘢叫反高潮？噚日的市況就係一個完美示範！平保（2318）績佳兼加派末期息，高開3%之後段段派貨，埋單倒跌3%兼daylow收市，同我一樣等紅底的戰友
，似乎又要再坐一會。
吉利（175）業績靚爆鏡，結果又係倒跌收場，呢個究竟係咩玩法？
最簡單直接的解釋，就係好消息出貨，想要更堅實的原因，我會理解為不少個股已處於歷史高位，股價某程度上已炒定績優這個元素，是故出現「業績佳照跌、業績差喪跌」的怪現象。
執筆之時騰訊（700）剛出業績，同樣遠勝預期，但股價會否又玩反高潮，根據上述理據，大家應該要有心理準備。無論如何，股王依然係股王，相信調整過後會再創新高，趁回調分段吸納呢招，繼續有效！
嚟緊仲有乜嘢反高潮？最大機會就係招股認購反應破曬紀錄嘅毛記葵湧（1716）。「唔係嘛？會跌穿招股價？」反高潮唔一定要跌嘅，升得少、高開低收都足以讓人荷包出血。
今次毛記上市，相信吸引唔少fans捧場，正因為呢班很少甚至從未染指股票的人入場，或會打亂正常熱爆新股的節奏，加上貨源將會極度分散，係咪可以好似奶茶呀、眼科醫生呀升得咁勁？我唔敢太樂觀。
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com
