中環在線：薯片叔財產畀曬老婆管
■曾俊華噚日喺fb開live講理財。
前財爺曾俊華離開熱廚房超過一年，間唔中出席活動，噚日就應花旗銀行邀請喺facebook開live講理財，不過佢就表演耍太極，話老婆負責管佢嘅錢，自己唔使點理喎，仲話一張八達通就滿足到生活所需，代言人上身咁喎。
網
民問薯片叔叔曾有乜理財心得，佢憶述做官時，因為怕利益衝突，所以靠金融專家幫手理財，離開政府後就畀曬老婆管理。
靠八達通滿足生活需要
佢仲搖身變成八達通代言人，「我一張八達通，就滿足所有需要，買報紙、搭車，不過去會所就要簽卡囉」，有網民問佢每月使費幾多，佢又耍太極話冇統計，「我使好少，搭車、食飯、買書、唱片，我又唔去shopping嘅」。
問到薯片叔係咪過緊退休生活，佢就唔認同，話自己仲好忙，唔夠時間做嘢，希望做到100歲，仲呼籲大家要活到老學到老，「知識係有限期，唔能夠持續到100歲，30至40歲要讀一次書，60至70歲再讀一次書，確保自己緊貼社會。
薯片叔似乎亦搵到事業第二春，佢透露，想成立基金，教導創業嘅年輕人營運企業，「我識有啲人，連資產負債表都唔識睇」。總括佢目前嘅生活，佢話「離開政府後，所有選擇都係自己，冇受到束縛，係自由人」。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
