中環在線：羅範接替譚惠珠做五礦獨董
■噚日央企五礦出公告話羅範椒芬擔任獨董一職，接替譚惠珠。資料圖片
由國務院國有資產監督管理委員會持有嘅中國五礦，旗下香港上市嘅五礦地產，董事局噚日有變動，就係前港區人大代表譚惠珠唔撈，行政會議成員羅範椒芬接手獨立非執行董事一職，亦都係羅範椒芬第5
個上市公司獨董銜頭，同公職王行政會議召集人陳智思平排，而且加加埋埋，一年收嘅袍金接近250萬元！
每年共袋250萬袍金
噚日五礦出公告話，譚惠珠希望投放更多時間喺個人事務，所以辭任獨董一職，搵咗位政治背景相近、今年65歲嘅羅範椒芬接手，除咗獨董外，佢仲會擔任審核、提名、薪酬委員會成員，加埋嘅董事酬金有成36萬。
如果計埋羅範另外4間上市公司最近一年嘅董事酬金，包括中電、聯通、南旋、大唐西市，每年開下會，就袋超過250萬元，呢啲機會真係唔係個個都有㗎。
值得留意嘅係，羅範椒芬除咗上述職位，仲有唔少公職，包括香港科技園主席，喺政府致力推動提升本地科技水平下，點解羅範會咁得閒幫一間市值只有49億、每日成交額非常低嘅五礦地產做獨董？只能夠話，央企勢力真係好大囉。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
