獨角獸回A惹炒作
2018年03月28日
借住美國財長姆欽訪華，貿易戰有機會降溫，隔晚美股大漲，港股高開，但一如所料第一浪反彈已到尾聲，利好因素已經消化，權重股升幅唔算好大，港股反彈低過美股。部份彈得勁的股份，昨日下午已轉升為跌。
市場估計中國為了平息特朗普不滿，可能畀人民幣升值
，令人仔匯價顯著波動，在岸人民幣一度升穿6.25兌1美元，升超過430點子，其後升幅收窄。中國外匯交易中心公佈，人民幣即期收報6.2728兌1美元，升121點子，超過一個月以來最高。離岸人民幣亦由高位回落約300點子，較早時報6.267兌1美元。
中美貿易關係劍拔弩張，與熟悉內地情況人士傾起，兩國動真格機會有多大。大家睇法都係美國總統特朗普打響第一槍，旨在攞威，但埋枱周旋，又是另一回事。中美兩國為了貿赤角力，雙方都有國家利益考慮，但美國政制講求制衡，權力分散，總統有總統政治利益考慮，國會有國會政治利益考量，很難統一立場。中國則講求集中精力辦大事，決策相對一致，所以美國要爭點個人政治本錢比較容易，中國表面就算吃虧，但容易換取長遠利益，這是體制不同使然。
醫藥界華為惹憧憬
基本上這是大形勢，特朗普有時不按牌理出牌，但卻唔係咁易擺脫到體制慣性，照此推論的話，中國始終有辦法應對。可能外界睇法慢慢都係咁，所以全球股市跌一跌後又回穩，亞洲股市好似南韓都造好，港股周初低位成為短期一個支持。
內地股市都造好，上證指數收報3166點，升32點；深成指數收報10775點，上揚208點；創業板更加大升，收報1844點，升63點。內地最近炒作獨角獸上市，提振影子股炒作，股民希望借呢個機會分享甜頭。呢啲獨角獸股份，其中一隻係有「醫藥界華為」的藥明康德，市場炒作佢回A上市，於是同類股份引起追捧。喺貿易戰威脅爆發前，藥業股喺香港都炒得幾熱吓，相信都係跟住呢個潮流炒作。如果市況靜啲，可以留意藥業股會唔會跟住內地翻炒。
內地熱炒影子股，港股周二高開436點，隨即見全日高位30985，午後大致在30800點水平上落，恒指收造30790點，上揚242點；國企指數收報12301點，漲103點，成交1353億元。個股中聯通獲大行唱好，刺激股價向上，升5.6%，收報9.84元，為表現最好藍籌股；同時，中電信(728) 及中移動均受惠向上，中電信升2.4%，收報3.38元；中移動漲3.1%，收報72.75元。
內房股陸續公佈業績，龍頭股中國海外(688) 升4%，收報28.3元，為表現第三佳藍籌股；碧桂園(2007) 升3.6%，收報16.68元。
散戶唔鍾意炒大股，呢排新股熱未退，今日掛牌的超購王毛記葵涌(1716) 暗盤首掛開報3.5元，高低位分別為8.18元及3.5元；較招股價1.2元高好多，中一手最高價計賺萬幾銀。
毛記上埋電視誘散戶
經營《100毛》及毛記電視的毛記葵涌公開發售部份錄得超額認購約6288倍，觸發回撥機制，令該部份比例增至50%，一手2000股，中籤率僅為0.8%，認購1000手方穩獲一手。佢業績倒退但超購大爆飛，有個會計界人士解釋，話可能係毛記粉絲為表支持，一人一手認購吓，我唔排除有啲粉絲咁做，但絕對唔信咁會造成熱潮，單靠呢啲粉絲買得幾多。佢背後肯定有大戶發功，好似佢喺暗盤撩到咁高，連電視新聞都報吓，咁不知就裏的散戶就會留意咗，變成話題。大家講「冧巴」唔使理基金因素，咁就係大戶搵水第一步。總之，高高掛起到高位散貨，散戶見過心思思博反彈，咁就慢慢會落疊。呢啲粉絲捧場論只係做個理由出嚟，麻醉吓炒家，等佢哋炒得安心啲，咁先容易一網成擒。
其實，呢排新股圍飛咁容易，好似茶葉零售商英記茶莊(8241) 今日孖展截止，幾間券商又話有十幾億元孖展認購，以公開發售集資490萬元計，咁又超額認購逾245倍嘞。
陸羽仁
金融High Tea 舊文
來源 source: http://hdfin.stheadline.com
