中環在線：鄭志剛導賞 娥特想增藝術底氣？
■林鄭殺入Emerald City藝術展，細心聽Adrian介紹藝術品。
新世界發展（017）執行副主席鄭志剛（Adrian）熱衷發展藝術，不過今次唔只係搞藝術展覽咁簡單，仲為旗下K11 Art Foundation（KAF）藝術展，兼職做
埋導賞員，究竟咩人出動到佢呢？咪係特首林鄭月娥囉。
話說今個禮拜初，林鄭去咗呢個位於上環、名為Emerald City嘅藝術展，策展人係KAF藝術總監劉秀儀。
林鄭對藝術嘅認識有幾深？暫時係一個謎。不過據聞當日佢逗留半小時以上，與多位藝術家見面，聽Adrian介紹藝術品等等。
不忘hard sell西九
今次藝術展主題係幾何學，尤其重視用點、線、距離去解構世事萬物，展品包括繪畫、錄像、雕塑、場域特定裝置，雖然有啲抽象，但林鄭都幾有興趣。好似呢件由Carl F.Cheng創作嘅裝置作品《V.H.》，批判美國退伍軍人喺越戰初期遭受嘅待遇，林鄭似乎都有心機聽。
林鄭又話，希望將來多啲好似KAF等民間組織嘅展覽出現，讓年輕藝術家與策展人有更多創新嘗試，又邀請佢哋去西九展館睇睇舉辦藝術展嘅機會。
今次展覽係KAF首次包辦研究、策展同製作，參展嘅藝術家共有28位，10多位為大中華區新晉、具才華嘅藝術家，唔少都係80後。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
