毛記一浪製造世華亡魂
2018年03月29日
美國科技股大跌，杜指再向下插，港股跟住低開。睇番前日港股全日升幅收窄，陸羽仁喺網誌都話反彈已完，但見到昨日指數愈插愈多，都覺得有啲肉酸。
指數急滑，益顯昨日掛牌的毛記葵涌(1716) ，收報6.38元，表面計數較發售價1.2元，上升5
.18元或4.3倍，每手2000股帳面賺10360元，幾個毛記「腦細」帳面財富飆升到幾億元兼有得敲鐘攞威，都算攀上人生高峰點。睇番佢曾經高見11.76元，而且成交1.85億股，轉手率唔低，若高位追入比收市價已低45.7%，相信已屠殺咗一批高追散戶。
世華大股東高招抽水
呢次毛記大超購，基本上認購一千手方穩獲一手，若借大錢去認購，連同利息成本差不多要兩元一股，以佢高位計食胡都幾和味，基本上全日任何一個位出貨都贏錢，所以陸羽仁話入票抽飛博彩可以諗，高追就無謂。不過就算係咁，佢中籤率咁低，就算借錢認一百手都好難中，變咗蝕手續費，咁樣蝕本者亦都唔少。
毛記炒高回落，能否再創高峰，睇多兩個交易日就揭盅，高位接貨者會唔會做咗毛記亡魂要走著瞧，但早幾日炒毛記影子股者，就已經中晒招。間接持有毛記7.5%股權的世界華文報業(685) 在毛記掛牌日再插，股價收市大跌30%，報1.25元，呢個價比佢趁毛記概念造的高位3.69元低咗足足65%。
喺世華股價插水同時，世華主要股東張曉卿家族公佈，以套戥方式在香港沽、在馬來西亞買世華股份，賺咗六百幾萬元。由於世華喺大馬同香港都有掛牌，張曉卿家族見香港股價大幅炒上，變成大馬股份低水，於是喺香港沽貨，喺大馬買貨，單係咁樣已經執咗六百幾萬元，一買一賣抽水認真和味。早前陸羽仁話世華咁喪炒，有股者就算喺櫃桶底都應該挖出來賣，諗唔到大股東真係度到橋，賣香港掛牌股份，買番大馬股份賺差價。喪炒世華的大戶有無諗到會被人咁抽水呢？如果無就漏咗招。
世華大股東抽水食咗六百幾萬，大馬股東透過呢個機制沽咗貨，咁香港接貨股民就接咗火棒。香港股民喪炒毛記概念，若然世華再升，大馬股民同大股東又會夾手夾腳用套戥出貨沽世華股份。按照呢個玩法，世華股份供應就會比想像多，世華股價雖然經過大跌，但仍比起步點高五成，所以都仲係貴，呢一浸喪炒，相信已炮製咗一批股海亡魂。相比之下，同樣昨日大跌的萬華媒體(426) 大跌20%收1.32元，就已經死得無咁慘啦。
睇番毛記葵涌大幅波動，按照大戶派貨手法，多數係會彈上彈落博散戶落疊，逐步將散戶扮蟹，所以不排除會再炒番高啲以廣招徠。中環茶友問呢招其實幾舊，可唔可以成功散貨呢？陸羽仁答案係好大。
喺股海橋唔舊，最緊要受，就算有人明知火中取栗好大機會燒傷手指，但貪念仍會令好多散戶自覺身手可以靈活過大戶，手多多走出博反彈。毛記俾人揀中喪炒，皆因佢有知名度，容易編個故仔出嚟，雖然佢盈利倒退，上市價已經好貴，但仲有股評家夠膽叫人喺五元之下考慮長揸，又有人會報佢登出嚟，佢無講毛記五元一股等如13.5億市值，大過絕大多數香港傳媒股。但好多聽毛記個名唔識投資的新手，就隨時會撞過頭埋去。
炒反彈要留後着防身
中環茶友提起，新股炒完一兩年散咗，仲可以抽水夾散戶。過去好多超購王掛牌後都係業績走樣，賣殼收場，但大戶仲有多一招可以玩，就係先抽水集資吸乾散戶先再賣，所以投資者要炒呢啲無資產公司，就唔止要預咗輸，隨時仲要泵錢贖身，所以走去炒佢，基本上就連投機都唔係，皆因當中有危無機，只能算是死亡遊戲，參與者要記住就係︰萬般帶不走，唯有業隨身，最終都要後果自負。
昨日個市跌幅的確超過估計。本來以為期指結算，完咗計價時段市況會回穩啲，但尾市仲有好大沽壓，恒指收挫768點；國企指數收報12001點，下滑300點，成交1426億元。騰訊(700) 被長情大股東沽貨後元氣難復，收報412.2元，大挫4.6%；據披露權益資料顯示，騰訊總裁劉熾平減持騰訊100萬股，每股平均作價434.36元，套現約4.34億元。減持後劉熾平持有騰訊4596萬股，佔已發行股本約0.48%。
另外，中國平安(2318) 跌4%，收報80.15元；吉利汽車(175) 挫5.8%，收報22.6元；港交所(388) 急跌3.1%，收造255.2元。強勢權重股捱沽，個市大跌，有人難免膽怯，但有子彈者就會想低撈，喺呢啲波動市，走位靈活係搵食之道，再加一個防身辦法就係想買都買啲大股同有息派者，咁就進可攻、退都可以有得收息守吓。
陸羽仁
金融High Tea 舊文
來源 source: http://hdfin.stheadline.com
