收市閒情：叻仔公屋二代好大鑊
■現行社會制度下，公屋二代如果叻仔儲到錢，政府要佢走；但銀行嫌佢太窮，唔畀佢上車。資料圖片
早兩日，曾經喺八年前發表地產經典鴻文《買樓10大誤解》嘅數字兄，再喺Forum出Post，標題係「點解你買唔到樓」，第一個Point係四隻大字：「公屋之毒」。
數字兄個論點，大概係話公屋居民，因為願意接受較低人工，所以壓低整個香港的薪酬水平。我暫時唔討論數字兄個論點，但講到公屋問題，的確，公屋同私樓之間，出現咗個鴻溝！
朋友阿榮，由細到大同阿爸、阿媽，一家三口住公屋，穩定收入，月入28,000，加埋勤力上進，傭金收入多，炒股又有一手，畢業幾年，都儲到成150萬。「嘩，好叻仔呀，可以成家立室啦！」哼！你以為啦，因為係佢大鑊嘅開始！
房委會已經會收緊公屋富戶政策，公屋住戶入息或資產是但一樣，只要超出入息限額的5倍或100倍，就要被叮走。以一家三口為例，資產過咗224萬，就已經要同間屋講拜拜，結果阿榮因為叻仔，所以令到呢個家庭變成「公屋富戶」，從而令阿榮向鴻溝邁進。
於是阿榮就諗啦，「反正有150萬，都係時候自立買樓去！」不過，香港係好殘忍，唔係話有首期就買到樓！400萬樓，香港冇乜；就算你搵到個500萬樓，就算你All-in150萬去做首期，就算你只造七成按，你都上唔到車，根本唔過壓測！
即係點呢？政府就嫌你太有米，要你走；不過銀行就嫌你太窮，唔畀你上車。而你，就拎住嗰150萬，喺公屋同私樓中間個鴻溝吊吊揈。結果點呢，一係就舉家買二手綠表公屋；另一個Choice，就只有租樓。唔係話要批判房委叮走富戶有問題，而係現行制度同癲價下，衍生出呢一類首期以上、壓測未滿嘅「公屋二代夾心人」，月薪OK，同時儲到錢，不過冇得住公屋，但又買唔起樓。
呢個社會制度下，你叻仔儲到錢，唔代表有獨立置業嘅選擇；就算再叻多少少，收入多啲，都只係買到間仲逼過原先公屋嘅劏房。想問，呢個城市到底有幾鼓勵「公屋二代」脫離公屋？你同佢講上流動機？「唓，我間公屋有海景、有空中花園、間隔實用、冇發水窗台，我點解要咁辛苦自己儲錢去買劏房，做樓奴呀？」
如果你唔小心跌咗入去？Sorry，自己搞掂佢。
千頌C
http://fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.finance.appledaily.com
