Money Walker：當理財等於聽冧巴
■香港緊張嘅環境，多少都逼使港人投資上著重短炒多於理財規劃。資料圖片
朋友話MPF要打工仔投資收費高昂嘅基金固然問題多多，不過如果MPF好似美國401k咁可以自由揀股投資，最開心嘅肯定係班妖股莊家，事關又多咗批唔熟理財但又
有錢在手嘅人做潛在水魚。
香港老千股橫行，監管機構同傳媒都難辭其咎。不過除此之外，港人普遍理財知識偏向短炒個股，亦係問題所在，有關資產配置、財金陷阱、退休保險等，一般人認知少之又少。雖則證監會旗下有個投資者教育中心，但未見有助提升全民理財知識。
睇返美國，已經有券商為客戶提供投資教育平台，除咗教嚇基本分析、技術分析呢啲炒股ABC外，亦有講到退休理財同子女教育投資等長遠投資規劃。美國投資市場比香港早起步，投資者教育較香港成熟無可厚非，但香港緊張嘅環境，多少都逼使港人投資上著重短炒多於理財規劃。
當大家連呢一刻住屋問題都未搞掂，邊個得閒同你講乜嘢長遠財政規劃。人人但求炒股，盡快搵夠首期上車或買多幾層樓收租，至於後生仔份糧扣埋grant loan、MPF後得返幾千蚊閒錢投資，自然更加心急想以小博大，將理財同股票冧巴劃上等號。
其實唔止投資，香港傳統保險銷售手法仲打緊「關心」同「人情味」牌，亦係問題。
保險呢啲咁複雜嘅產品更應明買明賣，傳統嗰套銷售手法反而令呢樣用來控制風險嘅理財產品更令人抗拒，咁唔止對包括保險業在內嘅理財業界冇好處，當大眾越唔想接觸呢個範疇，相關知識亦只會越有限。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
