收市閒情：中興「柒事大全」
■中興被美國制裁，切斷供應鏈，成件事令中興高層嘅智商露曬底。資料圖片
中興（763）被美國制裁，切斷供應鏈，呢一切，唔止令中興露曬底；更重要係，令中興高層嘅智商露曬底！天啊！只要睇曬成件事來龍去脈，根本係一套笨賊喜劇！
話說成件事，中興目的只有一個，就係
要賺伊朗錢！呢頭同美帝簽禁運協議，轉個頭就靜靜雞同伊朗做生意！即係咁，你違約都算，都唔好咁豬呀大佬！
豬事一：
中興暗啞底同伊朗做生意，搵咗個法律顧問Ashley Kyle Yablon，全權負責打甩美國嘅調查；天下律師多的是，好搵唔搵，搵著個同伊朗有血海深仇嘅猶太人律師！大佬呀，你會唔會請一個醫生，去醫佢嘅殺父仇人？睇新聞讀嚇歷史OK？結果點呢，結果Yablon不但止唔幫中興偽造文件，劈炮之後就走去同FBI放料！
豬事二：
好啦，到後來中興啲高層發現個律師唔對路，就叫Yablon自己刪除所有相關文件，當時係2012年4月26日。喂呀！你有日發現屋企有賊，同佢講，「你自己放返偷咗嘅嘢去原位啦。」然後走咗去。話曬都係科技公司呀，你唔想一個員工接觸啲文件，直接鎖曬佢嘅權限，連機都沒收埋就最乾手淨腳！
果然，去到5月7月，足足兩個星期後，Yablon仲可以將全部Save曬犯罪紀錄嘅電腦交畀FBI！
豬事三：
話曬你都係做緊犯罪行為，唔見得光耶！但中興好霸氣架，根據喺網上廣傳嘅兩份「機密內部文件」，白紙黑字寫曬同伊朗交易策略，鉅細無遺講公司點避開監管。文件開頭都用暗號「YL」去代表伊朗嘅，去到後尾已直接寫「公司在伊朗、蘇丹、朝鮮、敘利亞及古巴五大禁運國均有在執行的項目」，慌死有犯罪資料寫漏咁。
最好笑係，連罪行被人發現後嘅後果，中興都分析清楚！一間中國第二大通訊設備國企，為食大茶飯，竟然將自己犯罪動機、策劃、同黨、後果整個懶人包出來，真係方便過捉奸在床！
豬事四：
最好笑係，正常罪證文件，都冇人肯認頭，但呢間公司啲高層，排住隊爭住喺份文件簽名，雞乸咁大隻字寫住「總裁批准：同意」。情況有如同人夾份買兇殺人前，開個誓師大會一樣咁壯烈！更厲害嘅係，呢份「機密內部」罪證，中興員工係可以輕易喺公司Server Download呢！中興啊，你點計都係一間科技公司啊，係咁意都加個密啊。
豬事五：
講開加密，中興真係好出色，話曬伊朗壇生意係價值13億美金嘅大茶飯呀，你畀掩口費都畀啲誠意。不過中興只係同知情人事簽保密協議，如果洩密嘅後果，只係賠償中興100萬元人民幣（15萬美元）。用100萬人仔保密協議去掩飾13億美元的違法行為，十個豬。
豬事六：
睇戲都有睇，「風頭火勢，避一避先好」。明明美國仲查緊中興，但中興唔識死，繼續犯案。
明明美國畀曬機會，叫你炒、懲處參與向伊朗售賣禁運設備39名員工，咁就唔頒禁令，點知不單止唔炒，仲有bonus收，真係當人死㗎？
豬事七：
中興高層去美國，董事長秘書部電腦，竟然有曬向伊朗出口設備會議的全部會議記錄、高層決策等等全部資料，都被美國海關檢查時睇曬。呢單喺國資委報告爆出！報告仲話「中興系列應對十分愚蠢和被動」。
成件事豬到一個點，係真係一個有睇開警匪片嘅人，都唔會犯嘅低智錯誤。最灰嘅係華為，中興文件好衰唔衰寫曬華為嘅手法，話要「大家！我哋要學曬對家嘅精粹！」結果，美帝就拎住呢份嘢質華為；依家仲搞到華為要退出美國市場！
「中華有為、中國興旺」，如果我係華為，死在豬隊友手上，都係心甘命抵，𠵱家死在「豬對手」手上，真係阿彌吉帝。
千頌C
千頌C
收市閒情 - 千頌C 舊文
來源 source: http://hk.finance.appledaily.com
