鋁大不能倒
2018年04月25日
美股前晚微跌，但據內地傳媒報道，中央政治局周一(23日)開會，除了提出持續擴大內需、加強發展關鍵核心技術、降低企業各種成本外，還表明要推動信貸、股市、債市、匯市、樓市健康發展，加上港股有大型集資下炒反彈，恒指攀升381點，各類股份都有反彈。
美
國10年期國債債息一度升上2.99厘，杜指上日一度跌過百點，收市跌幅收窄至14點。債息向上，反映市場估計聯儲局傾向調高利率，金融管理局總裁陳德霖撰寫網文派定心丸，強調「錢走息升」是港元利率正常化必經過程，亦是聯匯制度設計正常運作。佢話，銀行在《巴塞爾協定三》及各種限制下，炒家要像20年前借入大量港元資金去沽空港元，難度大增，要重施當日「雙邊操控」故技所需資金或「彈藥」，會是以千億元計。
由於美股前晚低開回穩，港股開市後無跟跌，指數好快彈高。當中俄鋁(486) 因為有可能放寬限制消息急彈。美國本月6日將俄鋁列入制裁名單以來，美國財政部首次提出放寬制裁條件，表示假如俄鋁大股東歐柏嘉放棄對公司控制權，就可能放寬制裁俄鋁。美國政府同時延長美國企業停止與俄鋁交易限期近五個月，由6月5日延後至10月23日。美國財政部長姆欽表示，美國正考慮俄鋁提出的要求，將俄鋁剔出制裁名單，強調俄鋁是因為與歐柏嘉關係而受制裁，而制裁影響已經浮現，但美國政府並非針對倚賴俄鋁及俄鋁附屬公司而努力工作的人。
海南限購唔算壞消息
美國財政部呢個係正式講法，唔係路邊社傳聞，同時開出條件好清楚。美國突然主動「釋出善意」，最大可能係有人背後發左功，譬如係一直被喻為喺西方有好強人脈的歐柏嘉，又或者揸左俄鋁的基金或對呢間公司有興趣的大戶。美國政府先前宣佈的禁令，令俄鋁一度進入休克狀態，但同時令到鋁價急升，好多同俄鋁有交易公司都受到嚴重影響，如果佢地唔能夠找到替代產品，咁生產大受打擊，美國政府都要同呢啲受影響大企業交代。
O依家禁令一鬆，全球鋁價即刻回軟，中鋁(2600) 股價回軟，收報4.47元，跌7%；俄鋁股價就急彈，一開市報1.92元，比上日收市1.52元升26%，而且愈升愈有，收市大升43%，收造2.18元。從全球供求平衡呢個角度睇，俄鋁係大到不能倒。若果開市唔怕貴摸入去，都執13.5%，認真係富貴險中求。
睇番呢次大和解前，曾經有消息話俄鋁曾經派人去中國，叫中國買公司產品，俄鋁股價應聲彈高，之後又話中國反應審慎，相信呢段時間俄鋁都同美國政府密斟，所以神又係美國，鬼又係美國，佢咁玩法，本來揸左貨的散戶就畀佢地打左荷包。
至於俄鋁後市，若你相信佢最後無事，現價2.18元，比大跌前的4.5元仲有好大距離，還是可以等回吐吸納範圍，總之佢仲會好波動，炒作要量力而為。
俄鋁股價跟住消息坐過山車，同樣情況喺海南概念股都出現。海南獲政策發展為自由貿易港，消息令相關概念股如航基(357) 彈上，跟住海南傳出限購令，喺當地有搞房地產的內房股應聲下插。不過有中環茶友話，市場聽到限購當係壞消息，但實際係唔係呢？海南今次要搞特區，樓價惹炒作係預期之內，過去海南都有借政策消息炒房地產熱潮，結果搞到一鑊泡，中央今次出招，應該係預期之內。呢樣嘢其實一啲都唔出奇，因為未來有大發展，照計必然吸引好多人流，如果無限購可能都搞唔掂。換轉嚟睇，若然公佈完消息都唔使限購，即係外界不起興趣啦，所以佢覺得有限購就算唔係好消息，都唔會係壞消息。睇番前日因消息一跌的內房股都反彈，碧桂園(2007) 升6.3%，收造16.26元，為表現最好藍籌股，航基就收10.46元，升3.6%。
憧憬中央托住個市
呢排市場變成政治市，內地提出促進股市健康發展政策，市場視為中央出招「托市」訊號，A股隨即急升2%。恒指最多曾升410點，其後升幅稍為收窄至381點；國企指數收報12244點，急漲244點，正在分拆平安健康醫療科技的中國平安(2318) 繼續受追捧，升幅1.5%，收報83.25元。大市成交只有975億元。
陸羽仁
金融High Tea 舊文
來源 source: http://hdfin.stheadline.com
