智取大市：騰訊走資流去邊
■匯控牌面不太差，預計稍後靠佢撐指數多過靠騰訊。資料圖片
騰訊（700）季度盈利遠勝預期，手遊條數相當強勁，投資者好明白，股王贏嘅係變現能力而非流量增長，但最終都要倚靠流量先可以確保未來變現能力。市場擔心抖音搶流量，只會繼續擔心落去，業績不足以扭轉呢種憂慮，
股價高開7%咁著數當然畀人齊齊散貨，的確，重倉嘅基金冇理由唔減佢，於是升幅火速收窄。
貿易戰等等嘅消息，一日好一日壞，投資者近排都失去耐性，更重要嘅係，失去耐性後，佢哋係沽貨多定買貨多？答案係逐漸形成換馬效應，剩係一隻騰訊都已經令港股基金及北水匆忙減磅，資金足夠散落其他大價股，友邦（1299）、恒生（011）呢類基本因素少有變化嘅優質股已見中線受惠，大趨勢不變下，估計近日兩隻股下跌只是唞唞氣。
至於匯控（005）估值勝在平，下星期美國眾議院可能就參議員之前批准嘅《多德-弗蘭克》法案改革議案投票，決定金融行業監管會否鬆綁，對匯控潛在利好。匯控月初曾經因為回購計劃縮水令市場失望，股價單日插水，但之後一周火速收復失地，近呢幾日跟隨市況受壓，但論牌面不太差，預計稍後靠佢撐指數多過靠騰訊。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
