【實力取勝】A股輸得你幾多？（陳承龍）（第179期）
2018-5-31 17:43:14
近排個市跌，但小弟依然傾向睇好後市，原因好簡單，市面上太多人一面倒睇淡，暫時都只會上區間上落，我會睇恒指29500到31500點之間浮浮沉沉。好多人睇淡之時，咁啱呢排其實又冇乜大沽盤，冇
乜動力向下沽落去，早排由29000點夾上31000點嗰一浸，好多淡友都已經夾死咗，呢一轉冇乜做淡，大家見冇乜熊證就知，仲喺市場嘅人，大多數都係博反彈嘅，不過呢排個市chok上chok落，小弟會喺29800點左右吸貨，主要係醫藥股、教育股同賭股。
醫藥股有國策支持，首選係石藥集團（1093），之前有個大smart money掃佢啲輪證，而維多命C需求都好大；賭股又係小弟長線睇好嘅板塊，不離不棄，首選係新濠（200），佢哋有新酒店6月開張，而銀娛（027）走勢亦都好靚；至於教育股呢，由於小弟冇乜受過教育，所以冇乜研究，哈哈，講笑啫。
至於A股呢，就一定要睇實。小弟返深圳開完戶口之後，覺得有好多商機，今期封面個A股故事，真係要睇實，A股仍然係一個封閉嘅市場，有好多投機價值，好多嘢都未被發挖，依家低吸佢，遲下應該係大茶飯，佢哋指數基數細，新股市場又好炒，當中嘅橋妙嘢就係，好多新股都會連續漲停板10幾20日，抽得中就真係發達，詳情就睇封面故事啦。依家A股3000幾點，最多咪跌落2000幾點，唔通跌到0咩？3000點應該都係鐵底，跌唔得多，跌咪最多唔玩咯。真係驚咪就買，買就咪驚。
其實再睇返呢，其實呢排睇淡嘅人，喺2月3月4月已經沽清沽淨，過去一周連作為強勢股嘅醫藥股同賭股都出現單日轉向，連啲最後沽盤都出現埋，唔排大巿已經離底不遠。
實力取勝 - 陳承龍 舊文
來源 source: http://www.winmoney.hk
